«Ratsıonalızator.kz» baıqaýynyń qorytyndysy jarııa etildi
Osyǵan oraı uıymdastyrylǵan baspasóz máslıhatynda «Tehnologııalyq damý jónindegi ulttyq agenttik» basqarmasy tóraǵasynyń orynbasary Ánýarbek Sultanǵazın jeńimpazdardyń esimderin atady.
«Jyldyń úzdik raıonalızatorlyq sheshimi» atalymy boıynsha 1 oryn men 1,5 mln. teńge kólemindegi qarjylaı júlde Qazaq maqta sharýashylyǵy ǵylymı-zertteý ınstıtýtynyń qyzmtkerleri Ibadýlla Úmetaev pen Orazbek Bıǵaraevqa buıyrdy. «Olar «Topyraqty 55-65 sm-ge deıin tereń qopsytý ádisi» jobasyn usyndy. Bul sheshim búginnniń ózinde nátıjesin berip, maqta ónimin 2 esege ulǵaıtýǵa septigin tıgizdi. Oǵan qosa sharýalar topyraq óńdeýge biraz únemge qol jetkizdi. Máselen, eger buǵan deıin sebý jumystaryna deıin topyraqtyń ár gektaryn óńdeýge 18 myń teńge jumsalsa, jańa tehnologııany qoldaný shyǵyn kólemin 12-13 myń teńgege deıin azaıtýǵa múmkindik berdi», - dedi Á.Sultanǵazın.
Ekinshi jáne úshinshi oryndar «KSP stell» JShS Pavlodar fılıalynyń dırektory Vadım Savıtskıı men «Atyraý munaı óńdeý zaýyty» JShS-niń qyzmetkeri Aıgúl Aıtbaıqyzyna buıyrdy. Olar da sáıkesinshe, 1 mln. jáne 750 myńge kóleminde qarjylaı júlde aldy.
Al «Kásiporyndaǵy ratsıonalızatorlyqty qoldaýdyń úzdik júıesi» atalymynda «Qazaqstan Temir Joly» kompanııasy jeńimpaz dep tanylǵan.