R.Sársembaeva: Máslıxat depýtattyǵyna áıelder óz kandıdatýralaryn belsendi usynýy tıis

ASTANA. QazAqparat - Máslıxat depýtattaryn saılaýǵa áıelder belsendi qatysýlary tıis. Bul týraly búgin Ortalyq kommýnıkatsııalar qyzmetinde ótken brıfıngte QR Іsker áıelder qaýymdastyǵynyń prezıdenti Raýshan Sársembaeva málim etti.

«Máslıxat saılaýy áıelderimiz úshin genderlik teńdikke qatysty jaǵdaıdy jaqsartýǵa berilip otyrǵan jaqsy múmkindik. Tek azamattyq belsendilikterińizdi tanytyp, saılaýǵa óz kandıdatýrańyzdy kóbirek usynýyńyz qajet. Biz parlamenttik deńgeıde 30 paıyzdyq kórsetkishke jete aldyq, máslıxattada osy mejege qol jetkizýge ábden bolady», - dep atap ótti ol.
Qaýymdastyq prezıdentiniń sózine qaraǵanda, aımaqtarda máslıxat depýtattaryn saılaý kezinde áıelderge úlken qoldaý jasalýy kerek.
«Genderlik sezimtaldyq reıtıngisi boıynsha, biz óz pozıtsııalarymyzdy jaqsartyp alar edik. Osy baǵytta Áıelder isi jáne otbasy-demografııalyq saıasat Ulttyq komıssııa, Qazaqstannyń isker áıelderi qaýymdastyǵy jáne úkimettik emes uıymdar qyrýar jumystar atqaryp keledi. Barlyq jerlerde trenıngter, sheberdik synyptary ótkizilýde, aımaqtarda áıel-saıasatkerdiń klýby men áıelderdiń kóshbasshylyq mektebi qurylǵan. Menińshe, saılaý protsesindegi áıelderdiń belsendiligi oblystyq, qalalyq jáne aýdandyq máslıxattardaǵy áıelderdiń úlesin 30%-ǵa kóterýge múmkindik beredi», - dedi R. Sársembaeva.