Іri kompanııalar BQO-da sý tasqynynan zardap shekkenderge úı salýǵa jáne satyp alýǵa kómektesedi

<p>ORAL. KAZINFORM - Vıtse-premer Qanat Bozymbaev, &laquo;Astana Group&raquo; negizin qalaýshysy jáne tóraǵasy Nurlan Smaǵulov, &laquo;Bank TsentrKredıt&raquo; dırektorlar keńesiniń tóraǵasy Baqytbek Baıseıitov, &laquo;Jusan Bank&raquo; dırektorlar keńesiniń tóraǵasy jáne aktsıoneri Ǵalymjan Esenov, &laquo;QazAzot&raquo; dırektorlar keńesiniń múshesi Rústem Aıazbaev, &laquo;Qazaq Stroy&raquo; quryltaıshysy Nurlan Artyqbaev jáne &laquo;Alageum Electric&raquo; dırektorlar keńesiniń tóraǵasy Erkebulan Іlııasov Batys Qazaqstan oblysynda boldy.</p>

Olar Oral qalasynyń sý basqan saıajaı massıvterin aralap, sý tasqynynan zardap shekkenderge arnalǵan úıler salynyp jatqan Terekti aýdanynyń Podstepnoe aýylyna bardy, sondaı-aq evakýatsııalyq pýnkttegi jergilikti turǵyndarmen kezdesti.

Óńirdegi sý tasqyny jaǵdaıy aıtarlyqtaı turaqtandy. 8,5 myńnan astam adam úıine oraldy. Komıssııa úılerdi tekserýdi jáne zalaldy baǵalaýdy jalǵastyrýda.

Aldyn ala málimet boıynsha, 466 JTQ jáne jalǵyz turǵyn úı bolyp tabylatyn 2,5 myńnan astam saıajaı úıleri jóndeýge jatpaıdy.

Qanat Bozymbaev úıler men saıajaılardy baǵalaý men tehnıkalyq tekserýdi aıdyń sońyna deıin aıaqtaýdy tapsyrdy.

Foto: QR Úkimeti

Syrym, Qaratóbe, Terekti, Bórli jáne Báıterek aýdandarynda 357 úıdiń qurylysy bastaldy. Ákimdik merdiger uıymdardy anyqtady. 

Úıler tamyz aıynyń sońyna deıin aıaqtalady dep josparlanýda. 

Syrym aýdanynda jalpy somasy 3,2 mlrd teńgege 114 úıdiń qurylysyn «Qazaqstan halqyna» qory qarjylandyrady.

75 úıdi jergilikti jer qoınaýyn paıdalanýshy kompanııalar salady: «Jaıyqmunaı», «Kondensat» jáne «AqsaıGazServıs». 

Taǵy 71 úıdi «Qarashyǵanaq Petroleým Opereıtıng» kompanııasy «Aqjaıyq» qory arqyly salady.

Foto: QR Úkimeti

Jalǵyz baspanasynan aıyrylǵan saıajaı turǵyndarynyń máselesine erekshe nazar aýdaryldy.

«Qala ákimdigine jaz bitkenshe saıajaı turǵyndaryna arnap turǵyn úı salý nemese satyp alý tapsyryldy. Aıta keteıik, burynǵy jerde úıler salynbaıdy. Oıpatty jerlerde JTQ salýǵa tyıym salynady», — dedi Batys Qazaqstan oblysynyń ákimi Narıman Tóreǵalıev.

Qanat Bozymbaev júrgizilip jatqan jumystardy jedeldetýdi tapsyrdy.

Foto: QR Úkimeti

«Óńirge kórsetiletin kómekti eskere otyryp, zardap shekken árbir otbasyn qoldaý sharalarymen dereý jáne artyq áýre-sarsańsyz qamtyp, barlyq tıisti tólemderdi júzege asyryp, turǵyn úı qurylysyn bastaýǵa kirisý qajet», — dep tapsyrdy Qanat Bozymbaev oblys ákimdiginde ótken keńes barysynda.

Sondaı-aq keńeste memleket tarapynan qarjylaı qoldaý kórsetý máselesi qaraldy.

Foto: QR Úkimeti