«Qurban-2020»: Almatyda 1300-den astam adam et alýǵa ótinish bildirgen

ALMATY. QazAqparat - Almatyda 1300-den astam adam «Qurban-2020» onlaın platformasy arqyly qurbandyqqa shalynǵan maldyń etin alýǵa ótinish bildirgen. Bul týraly Bostandyq aýdany «Baıken» meshitiniń bas ımamy Danııar Jumabaev aıtty, dep habarlaıdy QazAqparat tilshisi.

Qalanyń bas memlekettik sanıtar dárigeriniń qaýlysyna sáıkes, koronavırýs ınfektsııasynyń taralýyn boldyrmaý maqsatynda Qurban Aıt dástúrli merekesine qurbandyq shalý onlaın formatta ótedi.

Qurban shalýǵa jáne soıylǵan qurbandyq malynyń etin alýǵa ótinish berý úshin «Qurban-2020» onlaın platformasy qurylǵan.

«Búgingi tańda 1305 adam qurbandyqqa shalynǵan etti onlaın platforma arqyly alýǵa ótinish bildirgen», - dedi Danııar Jumabaev óńirlik kommýnıkatsııalar qyzmetiniń onlaın brıfıngi barysynda.

Sonymen birge, ol qala turǵyndarynan qurbandyqqa 49 qoı, 18 eshki jáne 8 basqa maldy shalýǵa ótinish túskenin aıtyp, tolyqtyrdy. Barlyq ettiń qaıyrymdylyq aıasynda muqtaj jandarǵa taratylatynyn atap ótken jón.

Qurbandyq shalýǵa jáne muqtaj, az qamtylǵan qala turǵyndarynyń et alýǵa qaldyrǵan ótinishterin alý saıtta 24 shildeden 30 shilde aralyǵynda júrgiziledi.

Qosymsha aqparatty 8(700)7197622, 8(727)3976390 telefondary arqyly bilýge bolady.

Aıta ketý kerek, Almatyda polıtsııa qala terrıtorııasynda Qurban aıt meıramy kezinde mal ákelýge, mal soıýǵa tyıym salyndy. Osy talaptardy qadaǵala úshin qalanyń aınalasynda 14 polıtsııa posty qoıylady.