Qazkom jáne Halyk bankteri týraly jelide jalǵan aqparat tarady - Halyk Group
«Eki banktiń ıntegratsııalaný protsesin aıaqtaǵaly otyrmyz. Bul TMD-daǵy eń aýqymdy ári teńdessiz ıntegratsııa protsesi. Negizgi jumystar oryndaldy, bankter biryńǵaı tehnologııalyq platformaǵa ótti. Bul klıentterge, tipti, baıqalǵan da joq ári qyzmet kórsetý jyldamdyǵy men sapasyna áser etpedi», - delingen habarlamada.
Halyk Group ókilderiniń aıtýynsha, Qazkom jáne Halyk bankteriniń qyzmeti týraly sońǵy kúnderi áleýmettik jelide taralǵan jaǵymsyz aqparattar shyndyqqa janaspaıdy.
«Tehnıkalyq birigýdiń sońǵy kezeńi shildeniń aıaǵyna qaraı iske asyrylady. Integratsııanyń sońǵy kúnderi, atap aıtqanda, 27 shildede Qazkomnyń bólimsheleri shekteýli rejımde jumys isteıdi. Al bankomattar jelisi úzilissiz jumys isteıdi, tólemder jáne kartadan aqsha aýdarý qoljetimdi bolady. 30 shilde, dúısenbi kúni bankterdiń barlyq bólimsheleri klıentterge tolyq qyzmet kórsete bastaıdy», - delingen málimdemede.
Halyk Group, sonymen qatar Halyk Bank jáne Qazkom qyzmeti týraly jalǵan aqparat taratqandarǵa quqyq qorǵaý organdaryna shaǵym túsirýi múmkin ekenin eskertedi.