Qazaqstanda júrýge yńǵaıly biregeı protez tanystyryldy
Almatydaǵy «Respýblıkalyq protez-ortopedıalyq ortalyq» AQ japon óndirisiniń erekshe ónimin usyndy.
Qazaqstanǵa protez jetkizetin Reseı mamany Mıhaıl Mıhaılovtyń aıtýynsha, protezdiń jańa túri naýqastarǵa úmit syılaıdy. Bul olarǵa aıaq-qoly saý adamdar sıaqty jumys isteýge, otbasyn qurýǵa, damýǵa, sportpen shuǵyldanýǵa múmkindik beredi.
«Zamanaýıı aıaq protezine jańa taban qoıyldy, ol aldyńǵy nusqalardan erekshe, onyń jilinshigi qozǵalmaly. Biregeı gıdravlıkalyq jilinshik fızıologıalyq tabıǵı baǵytqa jaqyndatady. Jańa protezder ınovasıalyq talshyqty shyny materıaldardan jasalǵan, olar berik jáne aýyr júktemelerge tótep bere alady», - dedi ol.
Jańa protezdi tanystyrý barysynda ortalyqtyń protezdeý tehnıgi jáne pasıenti Arman Ybraev onyń sapasyna joǵary baǵa berdi.
«Jańa protez modeli óte yńǵaıly, jyldam qozǵalady eken. Men shynymen de kádimgideı aıyrmashylyqty sezdim. Onymen júrý óte qolaıly. Bul meniń eski modeldegi aldyńǵy protezimnen áldeqaıda jaqsy eken», - deıdi Arman Ybraev.
Aıta ketý kerek, joǵary sapaly protezder Qazaqstanda respýblıkalyq protezdik-ortopedıalyq ortalyqta shyǵarylady. Kompanıa ártúrli jastaǵy naýqastarǵa arnalǵan protezdik-ortopedıalyq ónimderdi jasaıdy. Jyl saıyn ortalyq 30 myńnan astam protez ónimderin shyǵarady.
Ortalyqta qazir japondyq óndirýshilerdiń joǵary tehnologıalyq protezderi synaq rejıminde kórsetilip jatyr. Onyń qunyn jaqyn arada japondyqtar belgileıdi.
Búgingi tańda Qazaqstanda 49 703 adam protez qoldanýshy retinde tirkeýde tur. Bul kórsetkish únemi ózgerip otyrady. Ótken jyly 15170 adam protezdeý jáne ortopedıadan ótken. Olar protezderdi zańǵa sáıkes memleket esebinen tegin aldy.
Avtory: Alma Muqanova