«Qazaqstan» telearnasy «Jeltoqsannyń 16 kúni» derekti fılmin usynady
Búgin Ortalyq kommýnıkatsııalar ortalyǵynda ótken baspasóz máslıhatynda«Qazaqstan» RTRK» AQ basqarma tóraǵasy Erlan Qarın «Qazaqstan», «Qazsport» jáne «Balapan» telearnalaryndaǵy arnaıy jobalar týraly aıtyp berdi.
«Qazaqstan» teleradıokorporatsııasynyń quramyna kiretin barlyq telearnalar men radıo elimizdiń bas merekesi - QR Táýelsizdik kúnine erekshe kóńil bólip otyr. Osyǵan baılanysty biz barlyq úlken jobalardyń premeralaryn osy merekege arnadyq. Ózderińiz biletindeı, korporatsııamyzdyń, ásirese ulttyq telearnanyń basty maqsaty - ulttyq qundylyqtardy, ónerdi nasıhattaý. Sondyqtan BAQ, arnaıy telejobalar arqyly Táýelsizdik kúniniń mańyzyn jetkizýge tyrysyp otyrmyz», - dedi ol.
Erlan Qarınniń atap ótýinshe, telearnalar efırinde júrgiziletin arnaıy jobalar aldyn ala talqylanyp, baǵdarlamalyq keste ázirlengen.
«Mereke kúnderi barlyq telekórermenderimiz tanymdyq jobalar, derekti fılmder tamashalaı alady, sondaı-aq ulttyq arnada «Keıki mergen» jáne «Kúı ǵumyr» atty jańa teleserıaldardyń tusaýkeseri ótedi. Al «Balapan» óz kórermenderin birden úsh anımatsııalyq fılmniń premerasymen qýantpaq», - dep málim etti spıker.
Erlan Qarınniń málimetinshe, 16 jeltoqsan kúni saǵat 21:00-de «Men qazaqpyn» megajobasynyń sońǵy gala-kontserti ótip, jeńimpazdar belgili bolady. Al baıqaýdyń qazylar alqasy - tanymal mýzykanttar Uljan Baıbosynova, Aıgúl Elshibaeva jáne Aıgúl Úlkenbaeva ózderiniń mýzykalyq nómirlerin usynady.
15 jeltoqsan kúni saǵat 18:20-da Táýelsizdik kúnine arnalǵan «Jeltoqsannyń 16 kúni» atty derekti fılmniń kórsetilimi ótedi.
Sondaı-aq «Qazaqstan» arnasy «Igraphic» dızaın-stýdııasymen birge QR Prezıdentiniń eńbek joly, elimizdiń táýelsizdik jyldarynda damýy men jetistikteri týraly baıandaıtyn biregeı beınerolıkter toptamasyn ázirledi.
Budan basqa, ulttyq telearna kórermenderi «Umytylmas ánder» atty mýzykalyq kontsert pen «Ázil álemi» televızııalyq ázil-syqaq teatrynyń jańa shyǵarylymyn tamashalaı alady.
16 jeltoqsan kúni saǵat 10:10-da aýyr atletıkadan álemniń jáne Eýropanyń bes dúrkin chempıony Anatolıı Hrapatyı týraly «Anatolıı Hrapatyı: meniń ziltemirim» atty jańa derekti fılm efırge shyǵady. Al 19:35-te kórermen nazaryna «Qazaqstan fighter» realıtı-shoýy, saǵat 23:00-de boks jankúıerleri úshin «Astana arlans» Kýbogy oınatylǵan kásibı boks keshiniń kórsetilimi usynylady.
«Balapan» telearnasy jas kórermender úshin 10 jeltoqsannan bastap HD-formatta birden úsh jańa anımatsııalyq serıaldy daıyndady. Dúısenbiden bastap saǵat 12:35-te kishkentaı qazaqstandyqtar «Aıdar» mýltserıalyn, saǵat 12:45-te «Dala oıyndaryn» jáne 16:30-da «Ertemir» mýltserıalyn tamashalaı alady.
Sondaı-aq «Balapan» telearnasynyń efırinde «Orman kúzeti» jáne «Shahmat patshalyǵy» atty jańa mýltserıaldar kórsetiledi.
Avtory: Laýra Amantaeva