«Qazaqstan» telearnasy «Elorda ákimderi» jańa derekti fılmin usynady

NUR-SULTAN. QazAqparat - 6 shilde - Astana kúnine oraı «Qazaqstan» Ulttyq telearnasy «Elorda ákimderi» atty jańa derekti fılm túsirdi, dep habarlaıdy QazAqparat tilshisi.

«Qazaqstannyń astanasyn 20 jyldan astam ýaqyt ishinde 8 ákim basqardy jáne olardyń barlyǵy qala tarıhynda óz qoltańbasymen erekshelendi. QR Tuńǵysh Prezıdenti - Elbasy Nursultan Nazarbaev senim artqan saıası tulǵalardyń barlyǵy bas shahardyń qalyptasyp, damýyna óz úlesin qosty. Derekti fılmde qalany ár jyldary basqarǵan Á. Jaqsybekov, T. Dosmuhambetov, Ó. Shókeev, A. Mamın, I. Tasmaǵambetov, Á. Isekeshev, B. Sultanov jáne qalanyń qazirgi ákimi A. Kólginov Elbasynyń qala bıligin senip tapsyrǵan sátin eske alyp, el astanasynyń qaryshtap damýy úshin júktegen jospary týraly bólisedi», - delingen telearna baspasóz qyzmeti jibergen aqparatta.

Baǵdarlamada ár basshynyń tusynda júzege asqan jobalar men aıtýly oqıǵalar keńinen qamtylady jáne sol arqyly Elbasy Nursultan Nazarbaevtyń eńbegi men Qazaqstan astanasyn álemge tanytýdaǵy aıryqsha qoltańbasy kórsetiledi. Astanany aýystyrý tek kóshpen shektelmegeni, ony ortalyqtandyrý, kúlli álemge moıyndatý ońaı bolmaǵany sol qalany basqarǵan basshylar arqyly jetkiziledi.

Jobada QR Tuńǵysh Prezıdenti – Elbasy N.Nazarbaevtyń ult ómirin ózgertken utqyr sheshimderi, qaǵaz betindegi ıdeıalardan bastap, shyndyqqa aınalǵan sáýletti jobalarǵa deıingi tabandy eńbegi, iskerlik pen ekonomıkanyń qozǵaýshy kúshine aınalǵan el astanasyn tańdaýdaǵy baǵdar etip alǵan 32 ólshem týraly aıtylady.

Derekti fılm 6 shilde kúni saǵat 20:00-de «Qazaqstan» Ulttyq arnasynan efırge shyǵady.