«Qazaqstan» men «Qazsport» Jánibek Álimhanulynyń jekpe-jegin tikeleı efırde kórsetedi

ASTANA. QazAqparat - «Qazaqstan» teleradıokorporatsııasy otandyq kásipqoı boksshylarymyzdyń jekpe-jekterin «Qazaqstan» jáne «Qazsport»  telearnalarynda kórsetý quqyǵyna ıe boldy, dep habarlaıdy QazAqparat.

«4 qarasha kúni AQSh-tyń Tehas shtatyndaǵy El-Pasodaǵy Don Haskins Convention Center kesheninde qazaq boksshylary Jánibek Álimhanuly men Saǵadat Rahmanqul boks keshiniń andekartynda sharshy alańǵa shyǵady. Basty jekpe-jek meksıkalyq Mıgel Berchelt (34-1, 30 KO)  pen Mıgel Roman (60-12, 47 KO)  arasynda ótedi» delingen korporatsııa taratqan habarlamada. 

Bul - Jánibek Álimhanulynyń (3-0, 1 KO) kásipqoı bokstaǵy tórtinshi jekpe-jegi. Onyń qarsylasy - 32 jastaǵy amerıkalyq bylǵary qolǵap sheberi Von Aleksandr (12-1, 8 KO). Al, Saǵadat Rahmanqul (3-0, 1 KO)  pýerto-rıkalyq Nıklaýs Flazben (5-1, 4 KO) qolǵap túıistiredi.

Aıta keteıik, Jánibek Álimhanulynyń  áýesqoı boksta qol jetkizgen jetistikteri bir tóbe. Ol - álem jáne Azııa chempıony, Azııa oıyndarynyń jeńimpazy, Qazaqstannyń birneshe dúrkin chempıony. 2018 jyly Jánibek kásipqoı boksqa aýysyp, 3 jekpe-jek ótkizip úlgerdi. Barlyǵynda jeńiske jetip, bireýin nokaýtpen aıaqtady. Al, qarsylasy Von Aleksandr kásipqoı boksta 13 jekpe-jek ótkizip, 12-sinde jeńiske jetken. 8 kezdesýin nokaýtpen aıaqtaǵan. Saǵadat Rahmanqul  áýesqoı boksta 69 kelige deıingi salmaqta  2013 jyly el birinshiliginde top jaryp, al 2014 jyly kúmis júldeger atanǵan bolatyn.

Otandastarymyzdyń jekpe-jekterin «Qazaqstan» men «Qazsport»  telearnalary 4 qarasha kúni, saǵat 04:00-de tikeleı efırde kórsetedi.