Qazaqstan Barysy Grand Slam jarysyna 92 elden 519 sportshy tirkeldi

<p>ASTANA. KAZINFORM &ndash; Elordada 10-12 mamyr kúnderi dzıýdodan ótetin Qazaqstan Barysy Grand Slam jarysyna qatysatyn sportshylardyń esimderi belgili boldy.</p>

Dzıýdo federatsııasynyń baspasóz qyzmeti málim etkendeı, Astanaǵa 3 Olımpıada, 13 álem chempıony kele jatyr. Al jalpy Parıj Olımpıadasyna upaı beretin bul jarysqa 92 elden 519 sportshy tirkelgeni anyqtaldy.

Halyqaralyq dzıýdo federatsııasynyń kúntizbesine Qazaqstan Barysy Grand Slam ataýymen engen jarys qatysýshylarynyń qatarynda dzıýdo sportynyń jaryq juldyzy, úsh dúrkin Olımpıada chempıony, 12 dúrkin álem chempıony Teddı Rınerden (Frantsııa) bastap, Olımpıada jeńimpazdary men júldegerleri Akıra Sone (Japonııa), Rafaelıa Sılva (Brazılııa), Baýl An (Ońtústik Koreıa), álem chempıondary men júldegerleri Krısta Degýchı (Kanada), Tsogtbaatar Tsendochshır (Mońǵolııa), Djordj Fonseka (Portýgalııa), Van T End Noel (Nıderlandy), Valıd Kıar (Frantsııa), Tatsýrý Saıto (Japonııa), Grand Slam jeńimpazdary Doston Rozıev (Ózbekstan), Elıos Mantsı (Italııa), Barýh Shmaılov (Izraıl), Kýbanychbek Aıbekýýlý (Qyrǵyzstan) bar. 

Esterińizge sala ketsek, elimiz jarysty qabyldaýshy retinde ár salmaq dárejesinde maksımaldy 4 sportshydan shyǵarýǵa quqyly. Jaqsylyq Úshkempirov atyndaǵy jekpe-jek saraıynyń tórinde ótetin álemdik dodada Qazaqstan sapynan eki dúrkin Olımpıada júldegeri Eldos Smetov, Grand Slam chempıony Maǵjan Shamshadın, álem chempıonatynyń kúmis júldegeri Ǵusman Qyrǵyzbaev, Gran Prı jarystarynyń júldegeri Ǵalııa Tynbaeva bastaǵan sportshylar el namysyn qorǵaıdy.

Bul básekeniń nátıjesinde IJF erejelerine sáıkes jarystyń jeńimpazdary men júldegerleri arasynda Álemdik jáne olımpıadalyq reıtıngilerde upaılar bólinedi. Atap aıtqanda, І oryn úshin 1 000, ІІ oryn úshin – 700, al ІІІ oryn úshin – 500 upaı esepteledi. 

Baıraqty doda 2024 jyly Parıjde ótetin jazǵy Olımpıada oıyndarynyń qarsańyndaǵy sońǵy lıtsenzııalyq Grand Slam jarysy bolmaq.