Qazaqstan Barysy Grand Slam týrnırinde 42 elden kelgen dzıýdoshylar baq synasady

ASTANA. QazAqparat – Erteń Astanada bastalatyn dzıýdodan «Qazaqstan Barysy Grand Slam» týrnırine 42 memleketten kelgen 300-den astam sportshy qatysady, dep habarlaıdy QazAqparat tilshisi.

Týrnır aldynda ótken baspasóz maslıhaty barysynda BAQ ókilderi Qazaqstan dzıýdo federatsııasynyń bas hatshysy Ashat Jitkeevten saıysqa qandaı sebeppen «Qazaqstan Barysy Grand Slam» ataýy berilgenin surady.

«Máselen, bul jarys Mońǵolııada «Grand Slam Genghis Khan» ataýymen ótedi. Sondyqtan biz Qazaqstan barysy búkil álemge tanylsyn degen maqsatpen osyndaı ataý qoıyp otyrymyz. Bul – brend. Ony álemdik deńgeıge kóterý qajet. Qansha elden sportshylar keledi. Keler jyly ótetin týrnırge odan da kóp dzıýdoshy qatysady. Osy brend arqyly olar bizdiń elimizdi tanıdy», - dep jaýap berdi Ashat Jitkeev.

Aıta keteıik, ózge elderde uıymdastyrylatyn atalǵan saıys tek Grand Slam ataýymen ótedi. Bul rette elimizdegi jarysqa «Qazaqstan Barysy» ataýy qosylyp otyr.

Onyń aıtýysha, erteń elordada bastalatyn Grand Slam týrnırinde 42 memleketten kelgen 300-den astam sportshy baq synasady. Olardyń arasynda Olımpıada oıyndarynyń júldegerleri, álem jáne Azııa chempıondary bar.

Eske salaıyq, bıyl aqpanda Qazaqstan dzıýdodan Grand Slam týrnırin ótkizý quqyǵyna ıe bolǵan edi.

Al, birer kún buryn «Qazaqstan Barysy Grand Slam» jarysynda Qazaqstan quramasynyń atynan óner kórsetetin sportshylardyń tizimi jarııalandy.