QazaqGeography keńesinde Ulytaýda týrızmdi damytý máselesi talqylandy

ASTANA. QazAqparat - QR Ulttyq murajaıynda «Qazaqstandyq ulttyq geografııalyq qoǵamy» Respýblıkalyq qoǵamdyq birlestiginiń (QazaqGeography) otyrysy ótti. Bul týraly Mádenıet jáne sport mınıstrliginen málim etti. 

Jıyn QazaqGeography Qamqorshylyq keńesiniń tóraǵasy Kárim Másimovtiń jetekshiligimen ótti. Oǵan QR Premer-Mınıstriniń birinshi orynbasary Asqar Mamın, QR Prezıdentiniń kómekshisi Álıhan Smaıylov, QR Premer-Mınıstri Keńsesi basshysynyń orynbasary Erjan Babaqumarov, QazaqGeography ókilderi, «Ulytaý» qoryq-mýzeıiniń dırektory Bahtııar Qojahmetov (Birlestiktiń Basqarý keńesiniń múshesi, Qaraǵandy oblysyndaǵy QazaqGeography aımaqtyq ókildiginiń jetekshisi) qatysty.

Kún tártibinde - Birlestiktiń 2017 jyly atqarǵan jumystarynyń qorytyndysy jáne 2016 jyldyń 24 tamyzynda Ulytaý aýylynda ótken Birlestiktiń Basqarý keńesiniń otyrysynda qabyldanǵan suraqtardyń oryndalý barysy boldy.

«Ulytaý» qoryq-mýzeıiniń dırektory Bahtııar Qojahmetov atalmysh qoryq-mýzeıdiń Vızıt-ortalyǵynyń qurylysyna daıyndyq týraly baıandama jasap, Ulytaý aýylynyń turǵyndary atynan alǵys bildirdi.

QazaqGeography is-sharasyna  alǵash ret Orys geografııalyq qoǵamynyń (OGQ) vıtse-prezıdenti Kırıll Chıstıakov, OGQ Prezıdentiniń halyqaralyq qyzmetter boıynsha keńesshisi Sergeı Katıkov qatysty.