QazaqGeography Qamqorshylyq keńesiniń otyrysy ótti
Otyrys barysynda QazaqGeography-diń 2017 jylǵy atqarǵan jumystary jóninde Atqarýshy dırektor Jana Rústem, Medıa keńestiń tóraǵasy Erjan Babaqumarov jáne Basqarýshy keńesiniń tóraǵasy Qanat Baıǵarın baıandama jasady.
Jana Rústemniń aıtýynsha, QazaqGeography 2017 jyly 19 aýqymdy is-shara ótkizdi, olardyń arasynda Batys Qazaqstannyń kıeli jerlerine jasalǵan «Kıeli Qazaqstan» ekspedıtsııasy, «Han Qoryq» jastar festıvali, Saıram-sýdaǵy halyqaralyq mádenı-etnıkalyq «EtnoArtFest» festıvali jáne t. b. bar.
Qoǵamnyń sheteldik seriktesterimen birlesip, turan jolbarysyn, Prjevalskıı jylqysyn qaıta jersindirý boıynsha keshendi jumys jalǵasýda. A. j. 15 maýsymynda «Aıryqsha qorǵalatyn tabıǵı aýmaqtar týraly» Zańǵa tabıǵatta joǵalyp bara jatqan janýarlar túrlerin Qyzyl kitapqa engizý múmkindigi jóninde ózgertýler engizildi.
Sondaı-aq «Ulytaý» memlekettik ulttyq tabıǵı parkin qurý jáne Іle-Alataý parki men Qaıraq sarqyramasynyń týrıstik ınfraqurylymyn beıimdeý arqyly Іle Alataýynda shaǵyn toptar úshin, sonyń ishinde múmkindigi shekteýli tulǵalar úshin alǵashqy qoljetimdi týrıstik súrleýler salý boıynsha jumystar júrgizilip jatyr.
Budan ózge, QazaqGeography týrızmdi damytý boıynsha sharalar qoldanýda - «Aral - sheksiz qonaqjaılylyq» jobasy júzege asyrylyp jatyr, Aqmola oblysy Zerendi aýdanynda ekspedıtsııa júrgizildi. Sonymen qatar Almaty oblysynda qar kóshkinine qarsy jabdyqty engizý boıynsha jobaǵa qoldaý kórsetilýde.
Erjan Babaqumarov óz sózinde QazaqGeography medıa keńesiniń negizgi mindetine toqtaldy - ol Qazaqstan geografııalyq qoǵamy brendin kezeń-kezeńmen qalyptastyrý jáne onyń tanymaldyǵyn arttyrý, aqparattyq, baspa jáne aǵartýshylyq qyzmetti úılestirý.
Bıylǵy jyly QazaqGeography Memleket basshysy «Rýhanı jańǵyrý» baǵdarlamalyq maqalasynda alǵa qoıǵan mindetterdi júzege asyrý jumystaryna atsalysýda.
«Biz «Týǵan jer» jáne «Qazaqstannyń Qasıetti geografııasy» jobalaryna aıryqsha nazar aýdaryp otyrmyz. Otanǵa degen súıispenshilik, onyń geografııasyn, árbir qazaqstandyqqa kıeli sanalatyn mekenderdi tereń tanytý arqyly patrıotızmge úndeý - geografııalyq qoǵamnyń maqsaty», - dep atap ótti medıa-keńestiń tóraǵasy.
2017 jylǵy jumysty qorytyndylaı kele, Erjan Babaqumarov júzege asyrylǵan birqatar medıa jobalarǵa toqtalyp ótti. Onyń ishinde Batys Qazaqstanǵa jasalǵan ekspedıtsııa izderi boıynsha kıeli jerler týraly derekti televızııalyq habarlar toptamasyn shyǵarý, Aral teńiziniń jaǵdaıy jáne óńirdiń qazirgi ómiri týraly kitaptar, «Torǵaı» geoglıfterin arheologııalyq jáne geologııalyq zertteý nátıjeleri týraly ǵylymı kitapsha, Baıanaýyl kýrorttyq aımaǵynyń kartasyn basyp shyǵarý bar.
Erjan Babaqumarov sondaı-aq aldaǵy jylǵa jospardy belgiledi. Osylaısha, «QazaqGeography saǵaty» radıo baǵdarlamasyn qurý, Qazaqstan boıynsha kartalardyń, baǵdarlar men jolnusqalardyń elektrondy nusqalaryn shyǵarý, sondaı-aq jer, qoǵam jáne mádenıet týraly ǵylymdar salasynda jýrnalıstik zertteýler júrgizý úshin jyl saıynǵy granttar usyný josparlanǵan.
Basqarý keńesiniń tóraǵasy Qanat Baıǵarın atqarylǵan jumystar týraly aıta kele, QazaqGeography Jabaıy tabıǵat qory, sondaı-aq Reseıdiń, AQSh, Qytaı jáne basqa da elderdiń geografııalyq qoǵamdary sııaqty halyqaralyq uıymdarmen yntymaqtastyqty jalǵastyratynyn málimdedi.
Otyrysty qorytyndylaı kele, Qamqorshylyq keńesiniń tóraǵasy Kárim Másimov birqatar tapsyrmalar berdi.
Keńes otyrysynyń sońynda Qazaqstannyń tabıǵatyn, adamdary men qalalaryn jańa jáne kútpegen qyrynan kórsetetin úzdik fotosýretterdi izdeý maqsatynda 2017 jylǵy 25 shildeden bastap 24 qazanǵa deıin ótkizilgen «Meniń Qazaqstanym» fotobaıqaýynyń jeńimpazdary marapattaldy.
Tengrinews.kz jańalyq portaly men Massaget.kz oıyn-saýyq-aqparattyq portaly fotobaıqaýdyń aqparattyq seriktesteri boldy. Tengrinews saıtyndaǵy onlaın daýys berýdiń nátıjeleri boıynsha jeke júldege avtor Farıd Saıfýllın ıe boldy.
Qazylar alqasynyń quramyna ataqty qazaqstandyq fotograftar kirdi: Erbolat Shadrahov, Turar Qazanǵapov jáne Arman Jeńiskeev. Jeńimpazdar úsh nomınatsııada anyqtaldy:
• QazaqGeoNature: A. Koshkına, A. Seksenbaeva, K. Telegenov;
• QazaqGeoPeople: F. Saıfýllın, A. Jaqsylyqov, E. Fedorov;
• QazaqGeoTowns: T. Esekın, K. Tilegenov, S. Artıýshına.
Budan ózge, Qazaqstan Respýblıkasy Ulttyq mýzeıinde jeltoqsannyń 7-si men 29-y aralyǵynda QazaqGeography Qazaqstan ulttyq geografııalyq qoǵamynyń «Meniń Qazaqstanym» jáne Orys geografııalyq qoǵamynyń «Eń ásem el» fotobaıqaýlarynyń birlesken kórmesi ótkizilip jatyr. Kórmede fotobaıqaýlardyń barlyq toptamalary men nomınatsııalarynyń 41 úzdik jumysy usynylǵan.