Qazaq Kuresi: Aqtóbede ótetin álem chempıonatyna 40 elden balýandar qatysady

NUR-SULTAN. QazAqparat – Týrnır 15-16 jeltoqsan kúnderi Aqtóbe qalasynda ótedi, dep habarlaıdy QazAqparat tilshisi.

Qazaq kúresinen álem chempıonatyn «Qazaq Kuresi» halyqaralyq federatsııasy uıymdastyryp otyr. Týrnırge 40-tan asa eldiń sportshysy qatysady. Olardyń qatarynda: Ýkraına, Grýzııa, Avstrııa, Norvegııa, Estonııa, Frantsııa, Irlandııa, Germanııa, Pákistan, Ózbekstan, Iran, Ulybrıtanııa, Qyrǵyzstan, Úndistan, Lıtva, Slovenııa, Reseı jáne taǵy basqa elder bar. Balýandar 8 salmaq dárejesinde beldesedi.

Chempıonatta Ýkraına, Reseı, Qyrǵyzstan, Tájikstan, Grýzııa, Lıtva jáne Armenııa memleketterinen kelgen 8 tóreshi jáne óz elimizden 12 tóreshi tórelik etedi.

Aıtýly saıysqa jýyrda «Álem barysy-2019» jeńimpazy atanyp, eki dúrkin chempıon Aıbek Nuǵymarovty jeńgen reseılik Roman Bobıkov ta qatysatynyn rastap otyr. Reseılik sportshy +100 salmaqta jáne absolıýtti salmaqta beldesedi.

Jarystyń bas tóreshisi retinde – halyqaralyq dárejedegi Qazaqstan Respýblıkasynyń sport sheberi, Qazaqstan Respýblıkasynyń eńbek sińirgen bapkeri, PhD doktory Erbola Myrzabosynov taǵaıyndaldy. Qazaq Kuresi halyqaralyq federatsııasy altyn, kúmis, qola medaldardan bólek, úzdik tehnıka, ádemi ádis jáne taǵy basqa tehnıkasymen erekshelengen sportshylardy marapattaıdy.