«Qazaq Banki» salymshylarynyń 71 paıyzy óz aqshasyn aldy

ASTANA. QazAqparat - 2018 jylǵy 24 jeltoqsannan bastap Qazaqstannyń depozıtterge kepildik berý qory (QDKBQ) «Bank VTB» AQ EU agent banki arqyly «Qazaq Banki» AQ salymshylarynyń ótemaqysyn tólep jatyr, dep habarlaıdy QazAqparat.

8 qańtardaǵy jaǵdaı boıynsha, «Qazaq Banki» AQ 2 886 salymshysy agent bankke júginip, jalpy somasy 14,4 mıllıard teńgeni quraıtyn ótemaqy aldy. Bul - QDKBQ-nyń «Qazaq Banki» AQ salymshylary aldyndaǵy mindettemeleri jalpy somasynyń 71 paıyzy.

Agent bankke júgingen salymshylardyń 93 paıyzy tólemdi sol kúni aldy. Qalǵan 7 paıyzy, negizinen, múddelerin senimhat boıynsha tanytqan, ótinishteri negizinde zańdy qorytyndy talap etilgen úshinshi tulǵalar. Olar tólemdi zańnamamen belgilengen bes jumys kúni ishinde aldy. Salymshylardyń 84 paıyzy aqshany agent banktiń kassasynda qolma-qol alsa, 16 paıyzy agent banktegi nemese basqa da banktegi bank shotyna aýdartty.

Qazirgi tańda QDKBQ-nyń jalpy mindettemeler somasynan tólenbegen 29 paıyzy - kepildik berilgen ótemdi alýǵa áli júginbegen 15 myń salymshynyń aqshasy. «Qazaq Banki» AQ salymshylary 2019 jyldyń 24 maýsymyna deıin agent bankke kez kelgen ýaqytta júgine alady. Budan keıin ótinishti tikeleı QDKBQ-ǵa berýge bolady.

Tólem júrgizýdiń birinshi aptasynyń qorytyndysy boıynsha QDKBQ-nyń, agent bank pen «Qazaq Banki» AQ-nyń taratý komıssııasynyń koll-ortalyqtaryna 1 300 ret qońyraý shalyndy. «Qazaq Banki» AQ salymshylarynan 25 shaǵym tústi. Agent bank bólimshelerinde jumysty uıymdastyrý, bólimshelerdegi kezekter, kassany qolma-qol aqshamen toltyrýdy kútý sııaqty máseleler boıynsha shaǵymdar túsken bolatyn. QDKBQ men agent bank jumyskerleri árbir shaǵym boıynsha máselelerdi sheshý úshin búkil qajetti jumysty júrgizdi.

Bank VTB fılıaldary men bólimsheleriniń tizimimen myna veb-saıtta tanysýǵa bolady: www.vtb-bank.kz. Fılıaldar men bólimshelerdiń jumysy týraly aqparatty 5050 qysqa nómir boıynsha ala alasyzdar (uıaly telefonnan qońyraý shalý tegin).

Depozıtter boıynsha kepildik berý, ótemaqyny tóleýdi júzege asyrý tártibi, ótemaqy somasyn esepteý týraly barlyq máseleler boıynsha «Qazaq Banki» AQ salymshylaryna QDKBQ baılanys ortalyǵynyń qysqa nómirine 1460 habarlasýyna, sondaı-aq, [e-mail] elektrondy poshtasy boıynsha, www.kdif.kz veb-saıtynda saýaldaryn qaldyrýǵa nemese @kdif_ask Telegram-chaty arqyly suraq qoıýyna bolady.

Valıýtany aıyrbastaý baǵamy, syıaqyny esepteý men kapıtalǵa aınaldyrý, taratylatyn bank aldyndaǵy kepildik berilgen somasy men mindettemeler somasyn esepke alý sııaqty tólem somasyn esepteýmen baılanysty suraqtar týyndaǵan jaǵdaıda, salymshylar «Qazaq Banki» AQ-nyń taratý komıssııasyna júginý kerek.

«Qazaq Banki» AQ taratý komıssııasy jeke jáne zańdy tulǵalardyń ótinishterin 2019 jyldyń 21 aqpanyna deıin qabyldaıdy.