Qazaq Banki-niń depozıtter qabyldaıtyn lıtsenzııasy taǵy da toqtatyldy

ASTANA. QazAqparat - QR Ulttyq banki basqarmasynyń 2018 jylǵy 30 shildedegi qaýlysymen 31 shildeden bıylǵy 28 qyrkúıekke deıin «Qazaq Banki» AQ-nyń jeke tulǵalardyń depozıtterin qabyldaýǵa, jeke tulǵalardyń bank shottaryn ashýǵa lıtsenzııasy toqtatyla turady. Bul týraly Ulttyq banktiń baspasóz qyzmetinen málim boldy, dep habarlaıdy QazAqparat.

Bul sheshim tólem jáne aýdarym operatsııalary boıynsha sharttyq mindettemelerdi tıisinshe oryndalmaýyna, sondaı-aq únemi normatıvter men mindetti normalardy, lımıtterdi buzǵany úshin qabyldady.

«Lıtsenzııa jańa depozıtterdi tartýǵa jáne jeke tulǵalardyń jańa bank shottaryn ashýǵa qatysty áreketter boıynsha toqtatyla turady. Sonymen qatar osy sheshim banktiń qoldanystaǵy depozıtteri men klıentterine qyzmet kórsetý mindettemelerine qatysy joq», - dep naqtylanǵan UB málimetinde.

2018 jylǵy 1 shildedegi jaǵdaı boıynsha banktiń jeke tulǵalardan qabyldaǵan depozıtteriniń kólemi 22 mlrd teńgeni quraıdy.

Aıta keterligi, elimizdegi jalpy bank júıesi boıynsha «Qazaq Banki» AQ-nyń jeke tulǵalardyń depozıttik portfel úlesi jeke tulǵalardyń depozıtteriniń jıyntyq kóleminiń 0,3 paıyzyn quraıdy.

Esterińizge sala keteıik, Ulttyq banktiń qaýlysymen bıylǵy 28 sáýirden 27 shildege deıin Qazaq Banki-niń jeke tulǵalarǵa depozıtter men shottar ashýǵa lıtsenzııasy toqtatylǵan bolatyn.