Qazaq Air Astana - Ekaterınbýrg baǵytyndaǵy áýe reısterin ýaqytsha toqtatatynyn málimdedi

<p>ASTANA. KAZINFORM - Qazaq Air áýekompanııasy bıylǵy 28 jeltoqsan men 2025 jylǵy 27 qańtar aralyǵynda Astana - Ekaterınbýrg baǵyty boıynsha áýe reısterin oryndaýdy ýaqytsha toqtatýǵa májbúr ekenin málimdedi.</p>

– Reseıge ushý táýekelderin únemi baǵalaý nátıjeleriniń negizinde jolaýshylar men ekıpaj músheleriniń qaýipsizdigin qamtamasyz etý maqsatynda reıster toqtatyldy. Áýekompanııa qazirgi ýaqytta Qazaq Air táýekelderin baǵalaý sharttaryna sáıkes keletin Omby men Novosibirge reısterdi oryndaýdy jalǵastyrady, - delingen habarlamada.

Ekaterınbýrgke áýe reısterin qaıta ashý táýekelderdi qaıta baǵalaý qorytyndylary boıynsha júzege asyrylatyn bolady.

Toqtatylǵan reısterdiń jolaýshylaryna áýebıletteriniń tolyq qunyn qaıtarý qamtamasyz etiledi jáne áýekompanııanyń balamaly reısterine tegin qaıta brondaý usynylady.

Buǵan deıin Aqtaý mańynda Bakýden Groznyıǵa baǵyt alǵan ushaq apatqa ushyraǵanyn jazǵan bolatynbyz.

Ushaq bortynda 67 adam, onyń ishinde bes ekıpaj múshesi bolǵan. Oqıǵa saldarynan 38 jolaýshy qaza tapty.