Qazagstan jáne Qazsport telearnalary UFC-diń jekpe-jekterin kórsetedi

ASTANA. QazAqparat -  Qazagstan jáne Qazsport telearnalary álemge belgili sporttyq uıym UFC-diń jekpe-jekterin kórsetý quqyǵyna ıe boldy. Bul týraly Ortalyq kommýnıkatsııalar qyzmetinde ótken baspasóz máslıhatynda belgili boldy, dep habarlaıdy QazAqparat tilshisi.

Qazagstan jáne Qazsport telearnalarynda ústimizdegi jyldyń qyrkúıegi men jeltoqsan aılarynda UFC-diń 14 jekpe-jegi efırge shyǵady. Al 2019 jyly 40-tan astam týrnır kórsetilimi josparlanyp otyr.

Odan bólek, 16 qyrkúıek kúni barsha qazaqstandyqtar asyǵa kútip júrgen Golovkın men Alvarestiń revanshy kórsetiletin bolady. Otandyq telearnalar, sondaı-aq 6 qazanda Las-Vegasta ótetin Konor Makgregor men Habıb Nýrmagomedov arasyndaǵy aıqasty tikeleı usynady.

«Qazagstan jáne Qazsport telearnalary UFC-diń barlyq jekpe-jekterin bir ýaqytta kórsetetin bolady. Kelisimshart bir jarym jylǵa jasaldy. Endi qazaqstandyqtar otandyq telearnadan álemdik kúresterdi kóre alady. Bul biz úshin aıtarlyqtaı jańalyq. Búginde aldaǵy qyrkúıek, qazan aılarynda ótetin birneshe jekpe-jekti translıatsııalaýǵa daıyndyq jumystary júrýde», - dedi «Qazaqstan» RTRK AQ basqarma tóraǵasy Erlan Qarın.

 

Sonymen qatar telearnalarda UFC-diń aıqastaryn júrgizetin kommentatorlar týraly aıtyldy.

«Biz kásibı kommentatorlarǵa kastıng ótkizdik, sonyń negizinde 2-3 adam tańdap alyndy. Jýyrda UFC-diń jekpe-jekterin júrgizetin kommentatorlarǵa taǵy kastıng jarııalaımyz. Kastıngke jekpe-jektiń qyr-syryn biletin kez kelgen adam qatysa alady», - dedi «Qazsport»  telearnasynyń dırektory Pavel Tsybýlın. 

Ultimate Fighting Championship (UFC)  - aralas jekpe-jek sportynda jyldam damyp kele jatqan sporttyq uıym. Bas keńsesi AQSh-tyń Las-Vegas qalasynda ornalasqan. Búginde UFC-diń kez kelgen keshi álemniń túkpir-túkpirinen júzdegen telearnalar men mıllıondaǵan jankúıerlerdi jınaıtyn aýqymdy sharaǵa aınalyp otyr.