Qatar Airways Iran, Irak jáne Lıvanǵa áýe reısterin toqtatty

<p>ASTANA. KAZINFORM &ndash; Qatar Airways áýe kompanııasy Iran, Irak jáne Lıvanǵa ushýdy ýaqytsha toqtatqanyn, sondaı-aq Iordanııaǵa áýe reısin shekteý týraly jarııalady. Bul sheshim aımaqtaǵy shıelenistiń kúsheıýi jáne Izraıldiń Iranǵa soqqy berýi múmkin degen boljamdarǵa baılanysty qabyldanǵan.&laquo;Taıaý Shyǵystaǵy qazirgi jaǵdaıǵa baılanysty Qatar Airways Iran, Irak jáne Lıvanǵa jáne keri baǵyttaǵy ushýlardy kelesi habarlamaǵa deıin ýaqytsha toqtatty&raquo;, &mdash; delingen <a href="https://www.qatarairways.com/en-us/travel-alerts.html" target="_blank" rel="noopener">málimdemede.</a></p>

Áýe kompanııasy Iordanııaǵa reısterdi jalǵastyratynyn, biraq olar tek kúndizgi ýaqytpen shekteletinin habarlady. 
Kompanııa jolaýshylardyń qaýipsizdigin basty basymdyq dep atap, jaǵdaıdy muqııat qadaǵalap otyrǵanyn jáne qajet bolǵan jaǵdaıda qosymsha aqparat beretinin aıtty.
Jaqynda Lufthansa Group nemis ulttyq áýe kompanııasy Tegeran men Beırýtke reısterdi 2025 jyldyń basyna deıin toqtatý týraly sheshim qabyldaǵan edi. Bul Taıaý Shyǵystaǵy qaqtyǵystyń keńeıý qaýpine baılanysty boldy.
Lufthansa Group quramyna kiretin SWISS jáne Austrian Airlines áýe kompanııalary Tegeranǵa reısterdi 2025 jyldyń 31 qańtaryna deıin, al Beırýtke – 2025 jyldyń 28 aqpanyna deıin toqtatatynyn habarlady. Osy aptada Lufthansa Tel-Avıvke reısterdi 10 qarashaǵa deıin toqtatatynyn málimdedi.
Buǵan deıin Lıvandaǵy qaqtyǵys saldarynan kóshirilgen adamdarǵa aı saıyn 250 mıllıon dollar qajet ekeni habarlanǵan bolatyn.