Qarmet zaýytynda aqsha jymqyryp, kenshilerdi bopsalaǵan birneshe qylmystyq top ustaldy

<p>QARAǴANDY. KAZINFORM &mdash; Bıyl Temirtaýda úsh ret &laquo;Qaýipsiz qala&raquo; jedel-aldyn alý is-sharasy ótkizildi. Onyń barysynda buryn jasalǵan 23 qylmys ashyldy, izdeýde júrgen 9 qylmysker ustalyp, 3,7 myńnan astam ákimshilik quqyq buzý faktileri anyqtaldy, dep habarlaıdy Polisia.kz.&nbsp;</p>

Nátıjesinde 2024 jyly kásiporyndarda jasalǵan urlyq sany shamamen 46%-ǵa azaıdy.

Qarmet metallýrgııalyq kompanııasynyń nysandarynda urlyq jáne onyń qyzmetkerlerine qatysty basqa da aýyr qylmystar jasaǵan birneshe uıymdasqan qylmystyq toptardyń joly kesildi.

Ótken jyldyń naýryz aıynda Qarmet AQ-nyń metall ónimderin urlaýdy jolǵa qoıǵan 40 adamnan turatyn uıymdasqan qylmystyq top jáne onyń kóshbasshysy ustaldy.

2023 jyldyń tamyz aıynda aımaqtaǵy krımınogendik jaǵdaıǵa jáne kompanııanyń qyzmetine teris áser etken uıymdasqan qylmystyq top kóshbasshysy men 27 múshesi quryqtaldy.

— Qylmystyq isterdi tergeý nátıjesi boıynsha olardyń Qaraǵandy oblysynyń aýmaǵynda mıllıondaǵan jymqyrý, sondaı-aq aýyr jáne asa aýyr qylmystar jasaǵany týraly dálelder jınaldy. Tergeý aıaqtaldy. Endi is prokýrorǵa joldanady, — deıdi ІІM uıymdasqan qylmysqa qarsy kúres departamentiniń ókili Qýandyq Alpys.

Ótken jyldyń jeltoqsan aıynda Qaraǵandy oblysynyń Abaı aýdanyndaǵy Qarmet kásipornynyń shahterlerin bopsalaýmen aınalysqan uıymdasqan qylmystyq top joıyldy. 

Bıyl sáýir aıynda ІІM, UQK jáne Memlekettik kúzet qyzmeti Bas prokýratýranyń úılestirýimen metallýrgııa kombınatynan asa iri mólsherdegi aqsha urlaý boıynsha qylmystyq shemany jolǵa qoıǵan qylmystyq toptyń múshelerin ustady. 

— Qylmystyq shema baqylaýdaǵy merdigerlik jáne kúzet uıymdary arqyly joq taýardy jetkizýden turǵan. Shyǵyn 1,5 mlrd teńgeden asady. Ustaý jáne tintý sharalary bir mezgilde Qaraǵandy, Temirtaý jáne Almaty qalalarynda ótkizildi. Kúdiktiler qamaýǵa alyndy. Kásiporyndarda urlyqqa jol bermeý boıynsha jumys erekshe baqylaýda, — dedi Qýandyq Alpys.