Qarmet-te 8 saǵattyq aýysym: Kenshiler uzaǵyraq jumys isteı me

<p>ASTANA. KAZINFORM &ndash; Qarmet kompanııasynyń basshylyǵy qyzmetkerler arasynda saýalnama ótkizip jatyr. Saýalnamanyń negizgi maqsaty &ndash; jumys kestesindegi ózgerister týraly qyzmetkerlerdiń pikirin eskerý. Bul turǵyda jumys aýysymynyń uzaqtyǵy qandaı jaǵdaıda ózgeretinin agenttik tilshisi naqtylap bildi.</p>

Qaraǵandyda áleýmettik jelilerde kenshilerdiń 8 saǵattyq jumys aýysymyna kóshýi múmkin degen jańalyq shyqty. Bul ózgeriske kóptegen qaraǵandylyq narazy boldy. Jumys jaǵdaıy qıyn bolǵandyqtan, kópshilik bul jańashyldyqpen kelispeıdi.

Degenmen, Qarmet basshylyǵy ózgertýler kópshilik daýys bergen jaǵdaıda ǵana bolady dep málimdedi, ıaǵnı májbúrleýge jol berilmeıdi.

«Qarmet kompanııasy qazirgi kezde qyzmettiń barlyq salalarynda perspektıvti basqarý úlgilerin ázirleýmen ári engizýmen aınalysyp jatyr.Tıisti jobalardy taldaý úshin qyzmetkerlerdiń pikirlerin eskere otyryp, jan-jaqty talqylaý jasalady. Aıta keteıik, kompanııanyń saıasatyna sáıkes, jumys kestesine kez kelgen ózgeris eńbek zańnamasy jáne Ujymdyq shart aıasynda jumysshylar ókilderimen (kásipodaq uıymdarymen) belgilengen ózara is-qımyl tártibimen qabyldanýy múmkin», - delingen kompanııanyń baspasóz qyzmeti taratqan málimette.

Kenshilerdiń 8 saǵat jumys isteýi zańdy ma? Bul suraqty Qaraǵandy oblysynyń Eńbek ınspektsııasy jónindegi basqarmasynyń mamandaryna qoıǵan edik. Olardyń aıtýynsha, jumys aýysymynda jańa tártipti engizý nemese engizbeýdi jumys berýshi sheshedi. Óıtkeni, «Qazaqstan Respýblıkasy Eńbek kodeksiniń» 63-babynyń 1, 2-tarmaqtaryna sáıkes, eńbek tártibiniń erejesin jumys berýshi bekitedi.

«Eńbek etý erejesinde qyzmetkerlerdiń jumys ári tynyǵý ýaqyty, eńbek tártibin qamtamasyz etý jaǵdaılary jáne eńbek qatynastaryn retteýdiń basqa da máseleleri belgilenedi», - dep atalyp ótken vedomstvo aqparatynda.

Sonymen qatar, Eńbek kodeksiniń 72-baby 1-tarmaǵynyń 1), 2) tarmaqshalaryna sáıkes, kúndelikti jumysty (jumys aýysymyn) bólikterge bólýge myna jaǵdaıda ruqsat etiledi:

1) jumys qarqyndylyǵy ártúrli bolatyn jumystarda;

2) eger bul jumyskerdiń áleýmettik-turmystyq jáne ózge de jeke qajettilikterimen baılanysty bolsa, onyń bastamasy boıynsha jol beriledi.

Atap aıtqanda, zańǵa sáıkes kúndelikti jumysty bólý kezinde, ıaǵnı jumys aýysymyn bólikterge teńgerimdeý barysynda jalpy jumys ýaqyty kúndelikti jumystyń belgilengen uzaqtyǵynan aspaýy kerek. Sondaı-aq aýyr eńbek jaǵdaıynda jumys ýaqyty aptasyna 36 saǵattan aspaýy kerek.

«Qazaqstan Respýblıkasy Eńbek kodeksiniń 69-babyna qaraǵanda, aýyr jumystarda, eńbek jaǵdaılary zııandy nemese qaýipti jumystarda isteıtin jumyskerler úshin óndiristerdiń, tsehtardyń, kásipter men laýazymdardyń tizimine, aýyr jumystardyń, eńbek jaǵdaılary zııandy jáne qaýipti jumystardyń tizbesine sáıkes aptasyna 36 saǵattan aspaıtyn jumys ýaqytynyń qysqartylǵan uzaqtyǵy belgilenedi», - dep naqtylady oblystyq basqarma.

Jumys aýysymynyń ulǵaıýy turǵysynda kompanııa basshylyǵy kenshilerdiń jalaqysy kóteriletinin eskerip otyr. Degenmen, naqty sheshimdi saýalnamaǵa qatysatyn kenshilerdiń ózderi aıqyndaıdy.