Qarmet basshylyǵy Kostenko shahtasynda óndiristi qaıta bastaýǵa tyıym saldy

<p>Qarmet basshylyǵy - Andreı Lavrentev pen Vadım Basın Kostenko shahtasynda óndiristi qaıta bastaýǵa tyıym saldy. Kompanııa basshylary bul sheshim qaıǵyly oqıǵanyń qaıtalanýyna jol bermeý úshin jasalyp otyrǵanyn jetkizdi, dep habarlaıdy Kazinform tilshisi.</p>

Qarmet kompanııasynyń jumysshy toby shahtadaǵy jaǵdaımen tanysý úshin apat bolǵan jerge jaqyn núktege, 600 m-den astam tereńdikke túsken.

Shahta dırektory Andreı Boıko nysanda júrgizilgen tekserýlerdiń qorytyndylary, bolǵan jaǵdaıdyń sebepteri men saldaryn joıý boıynsha josparlanǵan jumystar, kómir óndirýdi qaıta bastaý áleýeti týraly baıandady.

"Andreı Lavrentev pen Vadım Basın Qarmet basshylyǵy retinde júrgizilip jatqan kúrdeli jumystarǵa rızashylyqtaryn bildirdi, alaıda qaıǵyly oqıǵanyń qaıtalanýynyń kez kelgen yqtımal faktorlary joıylǵanǵa deıin shahtada óndiristi qaıta bastaýǵa tyıym salyndy. Olar jumystardy oryndaýǵa baǵyttalǵan barlyq qajetti qarajat Kómir departamentiniń ınjenerleri úshin qoljetimdi ekenin atap ótti", - dep jazylǵan Qarmet telegram-arnasynda.

Esterińizge sala keteıik, 28 qazan kúni saǵat 02:33-te "ArselorMıttal Temirtaý" kompanııasyna tıesili Qaraǵandy oblysyndaǵy Kostenko atyndaǵy shahtada jarylys boldy. Apat kezinde shahtada 252 adam bolǵan, jer betine 205 kenshi shyǵaryldy.

Kostenko atyndaǵy shahtadaǵy TJ faktisi boıynsha Bas prokýratýra qylmystyq tergeýdi bastady. Kompanııanyń málimetinshe, lavada metan gazy jarylǵan. Oqıǵa ornynda apattyq-qutqarý jumystary úzdiksiz júrgizildi.

Oqıǵa ornyna Qazaqstan Prezıdenti Qasym-Jomart Toqaev ta bardy. Prezıdent qaza tapqan kenshilerdiń týystary men jaqyndaryna shyn júrekten kóńil aıtty. Memleket basshysy olarǵa jan-jaqty kómek kórsetýdi tapsyrdy.