Pýtın men Erdoǵan shaǵyn quramdaǵy kezdesý ótkizdi

ASTANA. QazAqparat - Dúısenbi kúni Ankarada Túrkııa men Reseı prezıdentteriniń kezdesýi ótti, dep habarlaıdy QazAqparat Anadoly agenttigine silteme jasap.

Málim etilgendeı, Vladımır Pýtın men Rejep Taııp Erdoǵan jabyq esik jaǵdaıynda tar aýqymdaǵy kelissózder ótkizdi. Ol bir saǵatqa jýyq jalǵasty.

Onyń nátıjesi boıynsha memleketter basshylary baspasóz máslıhatyn ótkizdi.

Túrkııa basshysy qorǵanys salasyn tilge tıek ete kele, Túrkııa men Reseı ókilderi bir apta ishinde kezdesý ótkizip, S-400 zenıtti-raketalyq keshendi  satyp alý máselesi boıynsha talqylaýdy aıaqtaıtynyn jetkizdi.

Erdoǵan sondaı-aq Vladımır Pýtınmen kelissóz barysynda Sırııadaǵy ahýaldy talqylaǵanyn atap ótti. Onyń aıtýynsha, bul baǵyttaǵy kelesi qadam - barynsha jaqyn ýaqytta Sochıde Sırııa boıynsha jańa kezdesýdi ótkizý bolady.

Túrkııa Prezıdenti Taıaý Shyǵystaǵy jaǵdaıǵa qatysty da aıtyp ótti.

Onyń atap ótýinshe, Ierýsalım máselesi boıynsha Túrkııa men Reseıdiń ustanymy kóp jaǵdaıda uqsas. «Atalmysh másele boıynsha baılanystardy jalǵastyrý týraly sheshim qabyldadyq», - dedi túrik eliniń basshysy.

Al Reseı prezıdenti túrkııalyq áriptesimen birinshi kezekte Taıaý Shyǵystaǵy ahýaldyń ýshyǵýy men sırııalyq janjaldy talqylaǵandyǵyn aıtty.

Pýtın óz sózinde Túrkııa men Reseı AQSh-tyń Ierýsalımdi Izraıldiń astanasy retinde taný sheshimin jaǵdaıdy turaqsyzdandyrý dep sanaıtynyn jetkizdi. Olardyń paıymynsha, Palestınanyń mártebesi boıynsha máselede Izraıl men Palestına arasynda tikeleı baılanystar qajet.