Pýtın koronavırýsqa qarsy egildi

MÁSKEÝ. TASS-QazAqparat – Reseı Federatsııasynyń Prezıdenti Vladımır Pýtın koronavırýsqa qarsy vaktsına saldyrdy, dep habarlaıdy QazAqparat TASS agenttigine silteme jasap.

Prezıdenttiń baspasóz hatshysy Dmıtrıı Peskov TASS-qa málim etkendeı, V. Pýtınniń jaǵdaıy jaqsy jáne 24 naýryz kúni ol jumysqa shyǵady.

«Pýtın kornavırýsqa qarsy egildi. Ózin jaqsy sezinýde. Erteń tolyq jumys kúni bolady», - dedi Kreml ókili.

Degenmen, Kremlde Vladımır Pýtın reseılik úsh vaktsınanyń qaısysyn saldyrǵanyn naqtylamady. Buǵan deıin D.Peskov el prezıdenti saldyratyn vaktsınanyń ataýy ádeıi atalmaı otyrǵanyn málim etken edi. Sebebi «reseılik barlyq úsh vaktsına da barynsha senimdi ári tıimdi».

Reseı prezıdentin egý protsedýrasy ózge elderdegi saıasatkerlerde sııaqty kópshilikke kórsetilgen joq. Munyń sebebin jýrnalısterge Kreml ókili túsindirdi: «Kamera aldynda vaktsınalaýǵa kelsek, oǵan (Pýtınge) bul unamaıdy», - dedi ol.

2020 jyldyń 17 jeltoqsanynda Vladımır Pýtın múmkin bolǵan sátte-aq kovıdke qarsy vaktsınalanatynyn aıtqan edi. Ol kezde mamandardyń jas boıynsha shekteýlerge qulaq asyp otyrǵanyn jetkizgen bolatyn. Keıinnen prezıdenttiń baspasóz hatshysy Pýtınge koronavırýsqa qarsy egiletin ýaqytty belgileý onyń ýaqytyly alyp otyratyn ózge vaktsınalardy saldyrýmen baılanysty ekenin túsindirdi. Al birneshe preparatty bir mezgilde alýǵa bolmaıdy.