Pýtın: Qazaqstanǵa AES salýǵa járdemdesýge daıynbyz

NUR-SULTAN. QazAqparat – Reseı Prezıdenti Vladımır Pýtın Qazaqstanǵa atom elektr stansasyn qalýǵa járdem berýge daıyn ekendigin aıtty, dep habarlaıdy QazAqparat tilshisi.

«Qazaqstandyq áriptesim ári dosym beıbit atom salasyna qatysty aıtqan bolatyn. Biz kórshilerimizdiń, dostarymyzdyń, onyń ishinde Qazaqstannyń da atom energetıkasyn damytý jónindegi josparlaryn jiti qadaǵalap otyramyz. Qazaqstan Prezıdentiniń sóz sóıleýinde aıtqan usynysty tujyrymdaýǵa tyrysyp kóreıin. Reseı seriktesterine, onyń ishinde qazaqstandyqtarǵa atom elektr stansasyn salý jáne paıdalanýda járdemdesýdi ári qoldaý kórsetýdi usynady. Eger, sizder mundaı sheshim qabyldaıtyn bolsańyzdar», - dep atap ótti Reseı Prezıdenti XVII Qazaqstan men Reseı óńiraralyq yntymaqtastyq forýmynda.

Onyń atap ótýinshe, sóz respýblıkada tek atom elektr stansasyn salý ǵana emes sonymen qatar aýqymdy sala qurý jaıynda bolyp otyr.

«Sóz reseılik joǵary oqý oryndarynda atom energetıkasymen baılanysty jańa mamandyqtarǵa kadrlardy oqytýdy qamtıtyn tolyqtaı sala qurý jaıynda bolyp otyr. Atom elektr stansasynyń aýanyń lastanýyna yqtaly óte tómen. Reseılik mamandar kezeń-kezeńimen atmosferaǵa júktemeni tómendetip, tehnologııalardy jetildirýde. Tıimdi gaz tazalaý qondyrǵylaryn paıdalanýǵa engizip te jatyr. Jalpy, Reseı men qazaqstannyń ekologııa jáne jasyl ósim salasynda birlese jumys isteýi úshin zor keleshek bar ekendigin taǵy qaıtalaǵym keledi. Oǵan elderimizdiń barlyq óńiri belsendi túrde qosylady dep úmittenemin», - dedi Vladımır Pýtın.