Pýtın Qadyrovty Sheshenstan basshysy qyzmetinde qaldyrdy

ASTANA. QazAqparat - Reseı prezıdenti Vladımır Pýtın saılaý ótkenge deıin Ramzan Qadyrovty Sheshenstan basshysynyń mindetin atqarýshy retinde taǵaıyndaý týraly jarlyqqa qol qoıdy, dep habarlaıdy Bı-bı-sı.

Bul sheshimdi Qadyrovtyń ókilettik merzimi 5 sáýirde aıaqtalatyn bolǵandyqtan qabyldady, al saılaý qyrkúıekke belgilengen. Pýtın Qadyrovtyń aldaǵy saılaýǵa qatysatynyna senim bildirdi.

«Sheshenstan turǵyndary men halqy saılaý naýqany jáne saılaý barysynda respýblıka úshin jasaǵan isteriń úshin laıyqty baǵasyn beredi dep oılaımyn», - dedi Pýtın.

Ramzan Qadyrov aqpanda jýrnalısterge laýazymyn basqa adamǵa berýge ázir ekenin málimdegen. «Meniń ýaqytym jetken sııaqty. Ár adamnyń toqtaıtyn kezeńi bolady. Qadyrovqa da sol shaq jetti dep oılaımyn», - degen bolatyn ol NTV arnasyna.

Qadyrovtyń málimdemesi ol basqaratyn respýblıkada bir ýaqytta oryn alǵan birneshe daý-damaıǵa qatysty aıtylǵan bolatyn. Alaıda Pýtın Qadyrovtyń jumysy tıimdi júrip jatqanyn birneshe ret aıtqan, Kremlde onyń otstavkasy týraly másele qaralyp jatpaǵanyn habarlady.