Pýtın Asadqa saıası baspana berdi

<p>ASTANA. KAZINFORM - Sırııanyń Eks-prezıdenti Bashar Asad Máskeýge keldi, Reseı oǵan saıası baspana berdi, dep jazady reseılik TASS.</p>

Bashar Asadqa jáne onyń otbasyna saıası baspana berý týraly sheshimdi Reseı prezıdenti Vladımır Pýtın qabyldady. Bul týraly Reseı basshysynyń baspasóz hatshysy Dmıtrıı Peskov jýrnalısterge habarlady.

- Árıne, mundaı sheshimderdi memleket basshysynsyz qabyldaýǵa bolmaıdy. Bul onyń sheshimi, - dedi Kreml ókili.

Sonymen birge, Kreml ókili bul týraly resmı málimdemeler bolmaǵanyn, «keshe derekkózden aqparat taraǵanyn» atap ótti.

- Men qazir bul taqyryp boıynsha eshteńe aıta almaımyn, - dep atap ótti Peskov.

27 qarashada qarýly oppozıtsııalyq qurylymdar Aleppo men Idlıb provıntsııalarynda Sırııa armııasynyń pozıtsııasyna úlken shabýyl jasady. 7 jeltoqsanda keshke qaraı olar birneshe iri qalalardy (Aleppo, Hama, Deraa jáne Homs) basyp alyp, 8 jeltoqsanda Damaskke kirdi, Sırııa úkimet kúshteriniń bólimsheleri qaladan ketti. Sırııa úkimetiniń basshysy Muhammed Ǵazı Ál-Jalalı respýblıkada bılikti beıbit jolmen berýge daıyn ekenin bildirdi.

Reseı SІM málimdemesinde aıtylǵandaı, Asad Sırııa prezıdenti qyzmetinen ketip, bılikti beıbit jolmen berý týraly nusqaý berip, elden ketti. Keıinirek Kremldegi derekkóz Asadtyń otbasy múshelerimen birge Máskeýge kelgenin habarlady. Reseı gýmanıtarlyq sıpattaǵy sebepterge súıene otyryp, olarǵa baspana berdi.

Osyǵan deıin Sırııanyń keıbir qalalarynda komendanttyq saǵat engizilgenin jazdyq.