PTRK qazaq-qytaı yntymaqtastyǵy jaıly «Jańa altyn otyz jyldyq» derekti fılmin usynady
«Jańa altyn 30 jyldyq» dep atalatyn derekti fılmde resmı sapardyń Qasym-Jomart Toqaev pen QHR Tóraǵasy Sı Tszınpınniń kelissózimen bastalǵany baıandalady.
Memleket basshysynyń sol kúni Beıjiń Til jáne mádenıet ýnıversıtetine baryp, oqý ordasynyń aýmaǵyna qoıylǵan uly ǵalym, álemniń ekinshi ustazy atanǵan ǵulama babamyz Ábý Nasyr ál-Farabı bıýstin ashý saltanatyna qatysqany, sol jerde oqyp jatqan qazaq stýdentterimen kezdeskeni de fılmge arqaý bolǵan.
«Barshańyzǵa málim, Ál-Farabı – Shyǵystyń uly oıshyly, onyń álemdik órkenıettiń damýyna qosqan úlesi orasan zor. Ál-Farabı Qazaqstan aýmaǵynda týyp-ósti, bilim izdep kóptegen elge bardy. Matematıka, jaratylystaný, astronomııa, fılologııa jáne basqa da birqatar ilimdi damytýǵa zor eńbek sińirdi. Adamzattyń damýyna ólsheýsiz úles qosty. Men de kezinde osy oqý ornynda týra qyryq jyl buryn bilim aldym. Sondyqtan búgin Ábý Nasyr Ál-Farabıdiń músinin ashý – men úshin zor mártebe», - dedi Qasym-Jomart Toqaev saltanatty rásimde.
Dál osy ýnıversıtet qabyrǵasyndaǵy júrekke jylý uıalatar taǵy bir kezdesý fılmniń ajaryn asha túsken. Ol - ustaz ben shákirt júzdesýi. Ustaz – professor Lıý Shıtsın shákirt – Qasym-Jomart Kemelulyna Beıjiń lıngvıstıkalyq ınstıtýtynda taǵylymdamadan ótken kezde dáris bergen eken.
Kelissóz barysynda elaralyq saýda-ekonomıka, munaı-gaz, munaı hımııasy, energetıka, qarjy, kólik-tranzıt, atom ónerkásibi, mashına jasaý, týrızm, elektrondy kommertsııa jáne joǵary tehnologııa salalaryndaǵy yqpaldastyqty damytý máseleleri talqylanyp, nátıjesinde qos tarap mańyzdy qujattarǵa qol qoıylǵan.
Sondaı-aq derekti fılmde Prezıdenttiń qytaıdyń SINOPEC, YTO Express Co., Ltd, CRRC Sorporation Limited syndy kompanııalarynyń basshylarymen júzdesip, ekonomıkalyq baılanystarǵa basa mán berilgendigine de nazar aýdarylady.
Prezıdent resmı saparynyń basty maqsatynyń biri – «Bir beldeý, bir jol» halyqaralyq yntymaqtastyǵynyń ІІІ forýmyna qatysý bolǵan edi. Іs-shara barysynda Memleket basshysy úsh jyl ishinde 1300 shaqyrym jańa temirjol jol salýǵa, Qytaımen shekarada úshinshi temirjol ótkizý pýnktin ashýǵa, «Baqty» jáne «Qaljat» jańa qurǵaq porttarynyń qurylysyna qatysty josparyn ortaǵa salǵan.
Qasym-Jomart Toqaev resmı sapary barysynda Qazaqstannyń Abaı, Almaty, Shyǵys Qazaqstan jáne Jetisý oblystarymen shekaralas jatqan Shyńjań ortalyǵy Úrimshi qalasyna da arnaıy at basyn burǵan. Fılmde atalǵan shaharǵa sapar aıasynda Memleket basshysynyń Qytaı Kommýnıstik partııasy Ortalyk komıteti Saıası bıýrosynyń múshesi, Shyńjań-Uıǵyr avtonomııalyq aýdany partııa komıtetiniń hatshysy Ma Sınjýımen kezdeskenine, taraptardyń saýda, ónerkásip, kólik, logıstıka, aýyl sharýashylyǵy, týrızm taǵy basqa baǵyttar boıynsha Qazaqstannyń Shyńjańmen aradaǵy qarym-qatynasyn talqylaǵanyna basa mán berilgen.
Jańa «Altyn otyz jyldyq». Derekti fılm ataýy qulaqqa tosyn estilgenimen kóterer júgi, aıtar oı salmaqty. Aldaǵy 30 jylda ekonomıkalyq baılanysy myǵym, alys-berisi turaqty, tatý kórshilik baılanystary berik qazaq-qytaı qarym-qatynasynyń altyn dáýiri ótetindigin meńzep turǵandaı. Endeshe osynaý úlken sapar jaıly egjeı-tegjeıli derekti fılminen qanyq bolyńyzdar!