PTR taldaý jıyntyqtaryna bedeýlik týdyratyn kantserogender sińdirilgen - feık

NUR-SULTAN. QazAqparat – Telegram messendjerinde paıdalanýshylar PTR taldaýyna bıomaterıal jınaýǵa arnalǵan jıyntyqtarǵa kantserogen bolyp tabylatyn jáne bedeýlik týdyratyn etılen oksıdi sińdirilgen degen aqparatty talqylaýda. Bul jalǵan, dep habarlaıdy QazAqparat stopfake.kz saıtyna silteme jasap.

Etılen oksıdi – bul taza kúıinde qaýip tóndiretin gaz. Degenmen, adamzat ony ózine zııan keltirmeıtindeı qoldanýdy úırendi. 1950 jyldardan bastap etılen oksıdi medıtsınalyq qural-jabdyqtar men aspaptardy, sonyń ishinde joǵary temperatýrada nemese agressıvti ortada zararsyzdandyrýǵa bolmaıtyn plastık jáne basqa materıaldardan jasalǵandaryn zararsyzdandyrý úshin qoldanylyp keledi.

Bul rette qural-jabdyqtar men qondyrǵylarda sterıldeý nátıjesinde gaz bólshekteri qalmaıdy. Protsedýradan keıin zattar azotpen jáne taza aýamen óńdeledi, olar zattardyń betindegi etılen oksıdiniń qaldyqtaryn tazartady. Sodan keıin zararsyzdandyrylǵan zattar gazsyzdandyrý kezeńinen ótedi, ıaǵnı zararsyzdandyratyn zattyń qaldyqtaryn joıady. Bul protsess arnaıy jobalanǵan bólmede jasalady.
QR DSM sanıtarlyq-epıdemıologııalyq baqylaý komıteti etılen oksıdimen zararsyzdandyrýdyń qaýipsiz ekendigine qatysty pikirin buǵan deıin bildirgen bolatyn.
«Etılen oksıdimen sterıldeý arnaıy jabdyqty paıdalana otyryp júrgiziledi. Sterıldenetin zattardy germetıkalyq jabylatyn konteınerlerdiń nemese bokstardyń ishine salynyp, qospa býymen óńdeledi. Gazben óńdelgennen keıin aeratsııa (gazsyzdandyrý) protsesi bastalady, onyń máni gaz qospasynyń qaldyqtaryn «joıý» bolyp tabylady. Bul rette adam denesine 30 mınýtqa deıin janasatyn medıtsınalyq buıymdar (shprıts, plastık nemese aǵash qalaqsha, tampon) úshin aeratsııa ýaqyty 12 saǵatty. Eger medıtsınalyq ónim adamǵa 30 mınýttan artyq qoldanylatyn bolsa, 24 saǵatty quraıdy. Implantatsııalanatyn buıymdar (kardıostımýlıatorlar) keminde 72 saǵat aeratsııalaýǵa jatady», – dep túsindirdi vedomstvodaǵylar.
Sondaı-aq, Qazaqstanda ISO 10993-7-2016 sáıkes ónimdegi etılen oksıdiniń qaldyq quramyn anyqtaý boıynsha Qazaqstan Respýblıkasynyń toksıkologııalyq zerthanalarynda ýákiletti saraptamalyq uıymdardyń bıologııalyq materıal alý úshin zondtar partııalarynda ishinara zertteý júrgizip jatqany habarlandy.
Mundaı standarttar ártúrli elderde ázirlengen. Etılen oksıdin qoldaný boıynsha usynystar AQSh, Avstralııa jáne Eýropa elderinde jasalǵan.
Sonymen, etılen oksıdimen zararsyzdandyrylǵan quraldarda densaýlyqqa zııan keltiretin gaz bólshekteri qalmaıdy. Osylaısha tazartylǵan zattardy paıdalaný qaýipsiz jáne bedeýlik pen basqa aýrýlardy týdyrmaıdy. Etılen oksıdimen zararsyzdandyrý eń senimdi bolyp sanalady jáne kóptegen damyǵan elderde qoldanylady.