Psıhıkalyq aýytqýy bar: Tarazda er adam oınap júrgen balany soqqyǵa jyqty

TARAZ. QazAqparat – Tarazda er adam kóshede oınap júrgen kishkentaı balany soqqyǵa jyqty. Baqylaý kameralaryna túsip qalǵan vıdeo áleýmettik jelilerge tarap ketken, dep habarlaıdy QazAqparat tilshisi.

Vıdeoda er adamnyń samokat teýip kele jatqan balany urǵanyn kórýge bolady. Soqqynyń saldarynan bala asfaltqa shalqasynan qulaıdy. Ornynan turmaq bolǵan balany tebýge tyrysty.

Polıtsııa departamentiniń málimetinshe, Taraz qalasynyń polıtsııasyna Abaı dańǵylyndaǵy «Invıvo» medıtsınalyq klınıkasynyń janynda belgisiz adamnyń kámeletke tolmaǵan balaǵa dene jaraqatyn keltirgeni týraly qala turǵynynan aryz tústi.

«Atalǵan derek boıynsha QR QK 293-baby 1-bóligimen sotqa deıingi tergeý amaldary bastaldy. Polıtsııa qyzmetkerleri Jambyl aýdanynyń turǵynyn anyqtap, polıtsııaǵa jetkizdi. Tergeý barysynda kúdiktiniń psıhıkalyq aýytqýy bar ekendigi jáne qazirgi ýaqytta oblystyq psıhıatrııalyq aýrýhanada esepte turǵany anyqtaldy», - delingen vedomstvo habarlamasynda.

Kámeletke tolmaǵan balaǵa sot-medıtsınalyq saraptama taǵaıyndaldy.

Al, kúdikti sot-psıhıatrııalyq saraptama taǵaıyndalý úshin psıhıatrııalyq aýrýhanaǵa jatqyzylǵan.