Psıhıkalyq naýqastardyń kóktemgi aýytqýy - mıf álde shyndyq

<p>ASTANA. KAZINFORM &ndash; Densaýlyq saqtaý mınıstrligi psıhıkalyq aýytqýy bar jandardyń kóktemde minez-qulqy men is-áreketiniń ózgerýiniń sebebi men saldaryna qatysty túsinteme berdi.&nbsp;</p>

«Ǵylymı zertteýler psıhıkalyq aýytqýlary bar keıbir adamdarda kóktemde sımptomdardyń joǵarylaýy múmkin ekenin rastaıdy. Degenmen bul qubylystyń naqty mehanızmderi áli tolyq zerttelmegen. Psıhıkalyq aýrýy bar adamdardyń kóktem mezgilinde aýytqýyna baılanysty birneshe ǵylymı faktor bar. Kóktemde kúndizgi jaryqtyń uzaqtyǵy artady, bul aǵzanyń bıorıtmine áser etýi múmkin. Psıhıkalyq aýytqýlary bar adamdarda bul gormondardyń teńgerimsizdigine ákelýi múmkin, sonyń ishinde uıqy jáne tyń júrý, sondaı-aq kóńil-kúıdi retteıtin melatonın deńgeıiniń tómendeýine ákelip soǵady», - dep jaýap berdi mınıstrlik Kazinform agenttiginiń resmı saýalyna.

Sonymen qatar, vedomstvo maýsymdyq ózgeristerge de toqtalǵan. Qystan kóktemgi maýsymǵa aýysý aýa-raıy men temperatýranyń ózgerýimen qatar júredi, bul adamnyń psıhıkalyq jaǵdaıyna áser etýi múmkin. Mysaly, keıbir adamdarda atmosferalyq qysymnyń ózgerýi bas aýrýyn týdyrady, saldarynan psıhıkalyq buzylý belgileri kúsheıe túsedi.

Odan bólek, psıhıkalyq aýytqýǵa kúızelistiń de áseri bar eken. Kóktemde adamnyń ómir salty ózgerýi múmkin, buǵan jumys nemese áleýmettik ortadaǵy ózgerister jatady. Keıbir ózgerister kúızelisti týdyryp, psıhıkalyq buzylýǵa alyp keledi.

«Bıologııalyq faktorlarǵa kelsek, keıbir zertteýlerde ımmýndyq júıeniń ózgerýi nemese qabyný sııaqty jaıttar aıtylady. Olar psıhıkalyq aýytqýlary bar keıbir adamdarda kóktemde órshýi múmkin. Bıologııalyq faktorlar ózara árekettesip, adamnyń psıhıkalyq jaǵdaıyna áser etýi múmkin, biraq ol ár adamda árqalaı», - dep tolyqtyrdy mınıstrlikten.