Prjeval jylqylary brakonerlerden qalaı qorǵalady – mınıstrlik jaýaby

<p>ASTANA. KAZINFORM &ndash; Bıyl jazda elimizge 8 bas Prjeval jylqysy ákelinedi. Maqsat &ndash; olardy jersindirip, sanyn kóbeıtý. Sondaı-aq, 3-4 jyl ishinde Chehııadan jetkiziletin jabaıy jylqylardyń sanyn 40-qa deıin jetkizý jospary bar.</p>

Ortalyq kommýnıkatsııalar qyzmeti alańynda ótken baspasóz máslıhatynda «Bıyl maýsymda elimizge Chehııadan Prjeval jylqylaryn jetkizedi. Osy oraıda joǵalyp ketken jabaıy jylqyǵa brakonerlik qaýip tónbeı me?» degen saýal qoıyldy. 

«Qostanaı oblysyndaǵy «Altyn dala» rezervaty shtatynda 111 qyzmetker bar, onyń 86-sy ınspektor. Odan bólek, óńirde «Ohotzooprom» mekemesiniń qyzmetkerleri bar. Árıne, qaýipsizdik, jabaıy jylqylardy qorǵaý sharasyn kúsheıtemiz», - dep jaýap berdi Orman sharýashylyǵy jáne janýarlar dúnıesi komıtetiniń tóraǵasy Danııar Turǵambaev OKQ-de ótken brıfıngide. 

Óz kezeginde Qazaqstannyń bıoártúrlilikti saqtaý qaýymdastyǵynyń atqarýshy dırektory Vera Voronova zańsyz ań aýlaýmen kúreste birlesip jumys isteý qajettigin aıtty. 

«Iá, brakonerlik, bul - problema, onymen birlesip kúresýimiz kerek. Adamdar Qazaqstanda jabaıy jylqylardyń joıylý qaýpin bilgeni abzal jáne ony aýlaǵany úshin qylmystyq jaýapkershiliktiń baryn da umytpaǵan jón. Osy oraıda ákimdik qabyrǵasynda túsindirý jumystary uıymdastyrylyp, odan bólek, mektep oqýshylaryna arnalǵan bilim berý baǵdarlamasy ázirlenedi. Bul jumysqa «Ohotzooprom» mekemesiniń qyzmetkerleri tartylady», - deıdi ol.