«Proton-M» zymyran-tasyǵyshynyń apatyna baılanysty qylmystyq is qozǵaldy

ASTANA. 4 shilde. QazAqparat - «Baıqońyr» ǵarysh aılaǵynda oryn alǵan «Proton-M» zymyran-tasyǵyshynyń apatyna baılanysty qylmystyq is (RF QK 216 baby, 1 bóligi) qozǵalyp otyr. Bul týraly RF Tergeý komıtetiniń (TK) resmı ókili Vladımır Markın málimdedi.

Búginde apattyń barlyq sebepteri men oǵan kináli tulǵalardy anyqtaýǵa baǵyttalǵan tergeý áreketiniń kesheni qolǵa alyndy.

TK ókiliniń aıtýynsha, tergeýshiler tıisti qujattardy saraptap, zymyrannyń ázirligi men onyń ushyrylymyna jaýapty tulǵalardan jaýap alýda. Sondaı-aq, apattyń naqty sebebin anyqtaý maqsatynda saramtamalardyń keshenin taǵaıyndaý máselesi sheshilýde.

Eske sala keteıik, 2 shilde kúni «Baıqońyr» ǵarysh aılaǵynda №81 alańqaıdan úsh "Glonass" serigi bar «Proton-M» zymyran-tasyǵyshyn ushyrý kezinde apat oryn aldy. Zymyran jerge quldılap, jarylyp ketken.

Tergeýdiń málimetterine súıensek, apat saldarynan «Jahandyq navıgatsııalyq júıe» federaldyq maqsatty baǵdarlamasy boıynsha shyǵarylǵan úsh "Glonass" serigi bar «Proton-M» zymyran-tasyǵyshy joıylǵan. Nátıjesinde memleketke iri kólemde materıaldyq zalal keltirilgen.