Prorektor Sáýle Rahmetýllına: Kezekten tys saılaý - kezekti bir beles

ÓSKEMEN. QazAqparat - D.Serikbaev atyndaǵy Shyǵys Qazaqstan memlekettik tehnıkalyq ýnıversıtetiniń ujymy 9 maýsymda ótetin kezekten Prezıdent saılaýynda óz tańdaýyn bildirýge daıyn. Bul týraly bilim ordasynyń prorektory Sáýle Rahmetýllına aıtty, dep habarlaıdy QazAqparat tilshisi.

«Memleket basshysynyń úndeýi kóptiń kókeıinde júrgen saýaldarǵa jaýap berdi. Bul sheshimi arqyly ol el múddesin árqashan birinshi orynda ustaıtynyn kórsetti», - deıdi Sáýle Rahmetýllına.

Ǵalymnyń oıynsha, kezekten tys saılaý el damýyndaǵy jańa beles bolmaq.

«Prezıdent óz úndeýinde Qazaqstan halqy tarıhı kezeńdi bastan ótkerip jatqanyn atady. Halyq óz basshysyn ózi tańdaýy kerek. Bul - demokratııa prıntsıpi. Sondyqtan, qazirgi Prezıdent oryndy sheshim qabyldap otyr. Bul saılaý - damýdyń jańa bir belesi. Oǵan halyqtyń bir kisideı atsalysýy óte mańyzdy. Ýnıversıtet ujymy óziniń azamattyq tańdaýyn bildirýge daıyn. Saılaýdyń ótetini anyq edi. Onyń merzimi belgilenýi jaqyn bolashaqty aıqyndap berdi», - deıdi prorektor.

Sáýle Rahmetýllına memleket basshysynyń aldaǵy saılaýdyń ádil ótetinine kepildik berýi ustazdar qaýymynyń kóńilin jaılandyrǵanyn aıtady.

«Qasym-Jomart Toqaev ishki jáne syrtqy saıasattaǵy sabaqtastyq pen turaqtylyq saqtalatynyn eskertti. Meniń oıymsha, bul óte mańyzdy. Damýdyń dańǵylyna túsken jas memleketimizdiń aldynda aıaǵyn kútip turǵan iri jobalar men baǵdarlamalar bar. Sonyń bári biz kútken jemisin berýi úshin turaqtylyq qajet. Bizge de keregi sol», - deıdi S.Rahmetýllına.