Promoýter Tom Leffler Gennadıı Golovkınniń josparyn aıtty

ASTANA. QazAqparat – Orta salmaqtaǵy WBA Super, IBF jáne IBO chempıony Gennadıı Golovkınniń promoýteri Tom Leffler GGG jasy ulǵaıǵan saıyn óziniń eń jaqsy jyldarynda onymen judyryqtasýǵa batyly barmaıtyn basqa boksshylar úshin áldeqaıda tartymdy nusqaǵa aınalǵanyn atap ótti, dep habarlaıdy QazAqparat Sports.kz portalyna silteme jasap.

Sondaı-aq Tom qazaqstandyq boksshynyń mansabyn jalǵastyrýǵa nıetti ekenin jáne kelesi jekpe-jekte mindetti qarsylaspen kezdesetinin eske saldy. Golovkınniń qazirgi mindettti qarsylastary – brazılııalyq Eskıva Falkao men kýbalyq Erıslandı Lara.

«Gennadıı áli de orta salmaqtaǵy chempıon. Ol áli de osy salmaqta tıtýldarǵa ıe jáne men onyń kelesi jekpe-jeginde tıtýldy qorǵaıtynyna senimdimin. Qazir oǵan HBO-da óner kórsetken burynǵy kúndermen salystyrǵanda jekpe-jek ótkizý ońaıyraq. Ol kezde kóptegen boksshylar onymen judyryqtaspaý úshin álem tıtýldaryn bosatty. Bul buryn-sońdy bolmaǵan oqıǵa boldy. Bir qyzyǵy, endi Gennadıı jaqynda 41 jasqa tolady, al kenetten ony judyryqtasýǵa kóptep shaqyra bastady. Biraq men Gennadııdiń soqqy kúshi eshqaıda ketken joq dep aıta alamyn», - dep eskertti Leffler GGG-niń yqtımal qarsylastaryna.