Promoýter GGG-diń Maıvezermen yqtımal aıqasyna qatysty aıtty

ASTANA. QazAqparat - Gennadıı Golovkınniń (37-0-1, 33 KO) promoýteri Tom Leffler qazaqstandyq boksshynyń amerıkalyq kishi Floıd Meıvezermen (50-0, 27 KO) yqtımal aıqasyna qatysty pikirimen bólisti, dep habarlaıdy QazAqparat Sports.kz silteme jasap.

«Maıvezerdi jekpe-jekke shaqyrýǵa qatysty aıtý qıyn, sebebi ol mansabyn aıaqtaǵan. Eger «GGG onymen aıqasqa shyǵar ma edi?» degen suraqqa jaýap berý kerek bolsa, onda jaýap: «ıá!». Gennadıı qol jetkizgen jetistikteri úshin Floıdty asa qurmetteıdi. Ol «Floıdpen aıqas úshin 154 fýntqa deıin túsýge daıynmyn» dep aıtatyn», - dedi Leffler FightHub TV-ge bergen suhbatynda.

«Eger ol mansabyn aıaqtaýdy sheshse, bul onyń sheshimi. Ol rıngte qyrýar aqsha taýyp, jeńilip kórmesten mansabyn aıaqtady. Eger ol qaıta oralýdy sheshse, biz kelissózderge daıynbyz. Ol «Golovkınniń arnaıy effektileri joq» dep aıtatyn, ony tekserýdiń bir ǵana joly bar - onymen rıngte kezdesý. Biraq bul jekpe-jekke qyzyǵýshylyq eki taraptan da bolýy kerek», - dep sanaıdy qazaqstandyq boksshynyń promoýteri.