Prokýrorlyq tekserý: Qaraǵandy oblysynda 5 myńnan astam buzýshylyq anyqtaldy

QARAǴANDY. QazAqparat – Qaraǵandy oblysynyń ákimi Jeńis Qasymbek óńir qyzmetkerleriniń 40%-dan astamy eńbek etetin oblystyń iri kásiporyndaryndaǵy jaraqattaný jáne jumys jaǵdaılary boıynsha oblystyq prokýratýranyń keńeıtilgen alqa otyrysyna qatysty, dep habarlaıdy QazAqparat tilshisi.

Prokýrorlyq tekserýler barysynda bes myńnan astam buzýshylyq anyqtaldy. Onyń ishinde eki myńnan astamy shuǵyl joıýdy talap etedi.

«Búginde kómir salasy eńbek jaǵdaılary men taý-ken jumystaryn júrgizý kezinde eń qaýipti bolyp otyr. Tek «ArselorMıttal Temirtaý» shahtalarynda sońǵy jyly 42 adam zardap shekti, 9 adam qaza tapty. Kostenko, Kúzembaev, «Saran» shahtalarynda 70-shi jyldary jáne odan buryn ornatylǵan kótergish qondyrǵylardyń jaǵdaıy erekshe alańdatady», – dep jazdy Jeńis Qasymbek Facebook -tegi paraqshasynda.

Ol Temirtaýdaǵy JEO-2 jabdyqtary da alańdaýshylyq týdyratynyn atap ótti. Sońǵy jyldary qys aılary joǵary úreı rejıminde ótýde.

«ArselorMıttal Temirtaý» kompanııasynyń basshylyǵy bıyl jabdyqtardy jańǵyrtýǵa jáne ekologııalyq is-sharalarǵa 190 mlrd teńge bólýge nıetti ekenderin rastady», - dep habarlady Qaraǵandy oblysynyń ákimi.

Óńir basshysy kompanııa basshylyǵynan ózine alǵan barlyq mindettemelerdi, sonyń ishinde qaýipsiz óndiris pen adamdardyń eńbek jaǵdaıyn jaqsartýǵa qarajat ınvestıtsııalaý máseleleri boıynsha mindettemelerdi oryndaýdy talap etti.

«Men kez kelgen qyzmettiń eń joǵary basymdyǵy – adam ómiri men densaýlyǵy, al óndiristegi eńbekti qorǵaý jaǵdaıy memlekettiń ulttyq jáne ekonomıkalyq qaýipsizdigi salasynda ekendigine senimdimin», - dep tolyqtyrdy Jeńis Qasymbek.