Prokýrorlyq sharalarmen bıýdjettiń 5 mlrd. teńgeden astam somasyn negizsiz talan-tarajǵa salynýdyń joly kesildi - A.Daýylbaev
Bul týraly QR Bas prokýrory Ashat Daýylbaev málim etti.
«Sońǵy úsh jyldyń ishinde ǵana elimizde menshik ıelerine 12, 6 gektar jer jáne jyljymaıtyn múlik úshin 47 mlrd. teńge tólengen, bastapqyda osy qarajatqa 25 paıyz artyq jer, ıaǵnı 46 mlrd. teńgege 17 myń gektar satyp alý josparlanǵan bolatyn. Lımıttiń aıtarlyqtaı joǵarylatylýynyń basty sebebi alynatyn múlik qunyn jasandy kóterý bolyp otyr», - dedi Bas prokýror 2012-2013 jyldary jer telimderin memlekettik qajettikter úshin alynǵan kezdegi zańdylyq pen sot-prokýrorlyq tájirıbeniń jaı-kúıi týraly másele kóterilgen jıynda.
Onyń sózine qaraǵanda, prokýrorlar jergilikti atqarýshy organdardyń satyp alý baǵasyn durys aıqyndamaǵandyǵyn jáne onyń saldary 1 mlrd. 300 mln. teńgeniń negizsiz tólenip ketýine ákep soqqandyǵyn anyqtaǵan. Osyǵan deıin jeke menshikke zańsyz berilgen jer telimderin satyp alýdyń nátıjesinde memleketke 350 mln.teńgeden astam qarjyǵa zııan keltirilgen.
Onyń atap ótýinshe, respýblıkamyzdyń sottarynda 1 mlrd. 800 myń teńgeniń máselesin kótergen 84 talap-aryz qaralý ústinde. Qylmystyq qýdalaý organdaryna tapsyrylǵan faktiler boıynsha 22 qylmystyq is qozǵaldy, 95 materıalǵa is júrgizý sheshimderi qabyldaný ústinde.