Prokýrorlar urlanǵan 140 mln teńgeni Shveıtsarııadan elge qaıtardy

NUR-SULTAN. QazAqparat - 2019 jyly 15 qańtarda Shveıtsarııanyń Federaldy qylmystyq soty Qazaqstan Bas prokýratýrasynyń ótinishhatyn qanaǵattandyryp, «Qorǵas isi» boıynsha uıymdasqan qylmystyq toptyń músheleri zańsyz jolmen alǵan jáne keıinnen elden áketken 140 mln teńgeni qaıtarý týraly sheshim qabyldady. Bul týraly Bas prokýratýranyń baspasóz qyzmetine silteme jasap QazAqparat habarlaıdy.

Atalǵan qarjy toptyń belsendi músheleriniń biri, 2012 jyldan bastap osy iske qatysy bar degen kúdikpen halyqaralyq izdeýde bolǵan Maǵzum Ábdiralıevke tıesili.

«Aǵymdaǵy jyldyń 25 sáýirinde Shveıtsarııadan Ulttyq banktiń shotyna túsken aqsha jaqyn arada memleket kirisine alynady. Buǵan deıin 2018 jylǵy sáýirde prokýratýra organdarynyń osy is sheńberindegi ótinishhaty boıynsha memleket paıdasyna M.Ábdiralıevtiń 762 myń AQSh dollary men 915 myń teńge qylmystyq tabysy tárkilengenin atap ótken jón» delingen habarlamada.

Osylaısha, urlanǵan aktıvterdi qaıtarý boıynsha jasalǵan jumystyń nátıjesinde memlekettik bıýdjetke túsken qarajattyń jalpy somasy - 420 mln teńge.

Qazaqstannyń Bas prokýratýrasy sheteldik áriptesterimen birlesip, qylmystyq tabystardy shetelden qaıtarýǵa baǵyttalǵan jumystardy jalǵastyrady.