Prokýrorlar ótinishi boıynsha ereýilge qatysqan 676 adam qamaqtan bosatyldy

NUR-SULTAN. QazAqparat – Eldegi tártipsizdikter boıynsha 8354 ákimshilik is sotqa jetken. Bul týraly QR Bas prokýrorynyń aǵa kómekshisi Azamat Sarǵazın ortalyq kommýnıkatsııalar qyzmetinde ótken brıfıngide málim etti, dep habarlaıdy QazAqparat tilshisi.

«Ákimshilik quqyq buzý faktilerine jeke toqtalyp óteıin. Sottar osy oqıǵalarǵa baılanysty barlyǵy 8354 ákimshilik isti qarady. Sottar men prokýrorlar jeńildetetin mán-jaı men kináli adamdardyń ókingenin eskerip otyr. 3337 quqyqbuzýshyǵa qamaqqa alý nemese aıyppul túrinde jaza qoldanylmaı, eskertý ǵana jasaldy. 1653 is boıynsha sot aıyppul saldy. Osy sátte 1002 adam qamaqta», - dedi ol.

Aıtýynsha, qamaqtaǵy adamdardyń ákimshilik jazasyn jeńildetý maqsatynda prokýrorlar apellıatsııalyq sotqa 1758 ótinish hat engizgen.

«Qazirgi tańda prokýrorlardyń ótinish hattary boıynsha 676 adam qamaqtan bosatyldy. 344 adamnyń aıyppuly eskertýge aýystyryldy. Prokýrorlardyń jazany jeńildetýge jáne aıyppuldy eskertýge aýystyrýǵa baǵyttalǵan 738 ótinish-haty qaralyp jatyr. Budan bólek, taǵy 358 ákimshilik is materıaldary sotqa jiberilmeı toqtatyldy», - dedi Bas prokýrordyń aǵa kómekshisi.