Prokýrorlar kásipkerlerge salynǵan 1,5 mlrd teńge aıyppuldyń kúshin joıǵan

ASTANA. QazAqparat – Prokýrorlar 1,5 jyldyń ishinde kásipkerlerge salynǵan jalpy somasy 1,5 mlrd teńge bolatyn aıyppuldyń kúshin joıǵan. Bul týraly QR Bas prokýrory Berik Asylov bıznes ókilderimen kezdesýde málim etti, dep habarlaıdy QazAqparat tilshisi.

«Memleket basshysynyń tapsyrmalary aıasynda bıznesti zańsyz tekserýden jáne ákimshilik kedergilerden qorǵaý, kásipkerlerdi qylmystyq orbıtaǵa negizsiz tartý faktileriniń jolyn kesý, - osy salalardy tsıfrlandyrý baǵyttary boıynsha júıeli jáne dáıekti jumystar júrgizilýde.Onyń nátıjesi de bar. Eń áýeli tekserýlerdi 7 ese qysqarta aldyq», - dedi Bas prokýror.

Onyń aıtýyna qaraǵanda «Tekseriletin bıznes sýbetileri men obektileriniń biryńǵaı tizilimi» avtomattandyrylǵan júıesi arqyly jyl saıyn myńǵa jýyq zańsyz tekserýdiń joly kesiledi.

«Sonymen birge ákimshilik jaza qoldanýdyń zańdylyǵyna monıtorıng júrgizemiz. Bir jarym jyldyń ishinde prokýrorlar 35 myń kásipkerge salynǵan 1,5 mlrd teńge ákimshilik aıyppuldy alyp tastady», - dedi Berik Asylov.