Prokýrorlar qandaı jaǵdaıda tekserýler júrgizedi – zań jobasy
«Zań jobasy Konstıtýtsııanyń 83-babyna sáıkes ázirlendi. Konstıtýtsııanyń bul babynda prokýratýranyń negizgi fýnktsııalary bekitilgen. Olar – memleket atynan joǵary qadaǵalaý men qylmystyq qýdalaýdy júzege asyrý jáne sotta memleket múddesin bildirý. Konstıtýtsııada joǵary qadaǵalaý ári sotta memleket múddelerin bildirý zańda belgilengen shekte jáne nysandarda júzege asyrylady delingen. Zań jobasynda biz osy konstıtýtsııalyq ustanymdardyń sheginen shyqpaımyz, tek prokýratýranyń qadaǵalaý jáne basqa da ókilettikterin naqtylap ashyp, bir júıege keltiremiz», - dedi QR Bas prokýrorynyń orynbasary Áset Shyndalıev
Birinshi taraýda prokýratýra qyzmetiniń maqsattary men prıntsıpteri, quqyqtyq negizderi jáne basqa da máseleler berilgen. Ekinshi taraýda prokýratýranyń júıesi naqtylanyp, onda tıisti quzyretter anyqtaldy.
«Qujatta ár býyndaǵy prokýratýra organdaryna toqtalyp, olardyń quzyretin bekittik. Atap aıtsaq, Bas prokýratýra Quqyqtyq statıstıka jáne arnaıy esepke alý komıteti, Quqyq qorǵaý organdary akademııasy, oblystyq, aýdandyq nemese áskerı jáne kólik prokýratýralaryna derbes toqtalyp, olardyń negizgi qyzmetteri bekitilgen. Prokýratýra organdarynyń ókilettigi jeke bapta kórsetiledi. Ol bapta aýdandyq satydan bastap, Bas prokýratýraǵa deıin qandaı quqyqtar men mindetter bar ekeni anyq kórsetilgen. Biz olardy júıege keltirip, barynsha Konstıtýtsııalyq zańda bekitýge umtyldyq», - dedi Bas prokýrordyń orynbasary.
Sonymen qatar ol zań jobasynda joǵary qadaǵalaýdyń úsh nysany bekitilgenin aıtty. Olardyń qatarynda tekserý júrgizý, zańdylyqtyń jaı-kúıine taldaý jasaý, kúshine engen aktilerdi baǵalaý eskerilgen
«Tekserýdi Prezıdenttiń, Bas prokýrordyń tapsyrmasy jáne oblystar men aýdan prokýrorlarynyń sheshimi boıynsha júrgizetin bolamyz», - dedi Á. Shyndalıev.
Ótinishterdi qaraǵanda nemese tekserý júrgizgen kezde prokýror 3 jumys kúnge deıin laýazymdy adamdardyń aktileri men áreketterin toqtata turýǵa quqyly.
Mundaı qadam adam ómiri men densaýlyǵyna, memleket múddesine zııan kelýi múmkin bolǵan jaǵdaıda iske asyrylady. Ótinishter boıynsha prokýror ózi tekserý júrgize alady nemese tekserýdi ókiletti organǵa tapsyrady.