Prokýrorlar ınvestorlardyń 445 problemalyq keısin sheshti

<p>ASTANA. KAZINFORM &ndash; Prokýrorlar ınvestorlardyń jalpy somasy 8,3 trln teńge bolatyn 445 problemalyq keısin sheshti. Bul týraly Bas prokýratýradan málim etti.</p>

«Memleket basshysynyń tapsyrmasymen 2023 jylǵy sáýirden bastap prokýratýra organdary mańyzdy ınvestıtsııalyq jobalardy (ortalyq jáne óńirlik deńgeıde) súıemeldeıdi. Osy jumys aıasynda Syrtqy ister mınıstrligimen, «Atameken» UKP, bıznes-ombýdsmenmen jáne «Kazakh Invest» UK» AQ-men tyǵyz ózara is-qımyl jolǵa qoıylyp, birlesken buıryqtarǵa qol qoıyldy. Óńirlerdegi árbir prokýratýrada (aýdandyq deńgeıge deıin) ınvestorlarǵa quqyqtyq qoldaý kórsetý jáne ınvestıtsııalyq jobalardy iske asyrýdyń problemalyq jáne ózge de máselelerin sheshýge arnalǵan («bir tereze» qaǵıdaty boıynsha) front-ofıster (ákimdikter, UQK, QMA, SJQA, UKP jáne Kazakh Invest) quryldy», - dep atap ótedi Bas prokýratýradan agenttiktiń resmı saýalyna oraı.

Vedomstvonyń atap ótýinshe, memlekettik organdardyń negizsiz áreketterine jedel den qoıý úshin prokýratýra organdary janynan mobıldi toptar (call-ortalyq táýlik boıy jumys isteıdi) qurylǵan.

«Investıtsııalyq jobalardy prokýrorlyq súıemeldeý aıasynda prokýrorlar ınvestorlardyń 445 problemalyq keısin (ınvestıtsııa somasy 8,3 trln teńgeden asady) sheship, olar boıynsha 161 qadaǵalaý aktisin engizdi. Sottyń 4 sheshimi jáne memlekettik organdardyń 46 aktisiniń kúshin joıdy. Kóp jaǵdaıda ınvestorlardyń quqyǵy Astana, Almaty qalalarynda jáne Aqtóbe, Almaty, Qaraǵandy, Qyzylorda, Pavlodar oblystarynda qorǵalǵan. Olardyń arasynda sheteldik ınvestorlar (Qytaı, BAÁ, Qatar, RF, Germanııa, Sıngapýr, Koreıa jáne t.b.) da bar», - dedi qadaǵalaýshy organ.