Prokýrordyń negizgi protsestik sheshimderdi kelisýiniń jańa tártibi qandaı
«E-qylmystyq is» platformasynda prokýrordyń negizgi protsestik sheshimderdi kelisýiniń jańa tártibi tolyq iske asyrylýda. Bul qylmystyq ister materıaldaryna jedel qoljetimdilikti jáne buzýshylyqtardy ýaqtyly anyqtaýdy qamtamasyz etedi» -dedi QR Bas prokýrorynyń orynbasary Marat Ahmetjanov Quqyqtyq statıstıka jáne arnaıy esepke alý komıtetiniń tsıfrlyq jobalaryn tanystyrý barysynda.
Onyń aıtýynsha, bul joba Memleket basshysynyń 2020 jylǵy 1 qyrkúıektegi «Jańa jaǵdaıdaǵy Qazaqstan: is-qımyl kezeńi» atty Joldaýynda berilgen tapsyrmasyn oryndaý aıasynda engizildi. Osyǵan baılanysty, Bas prokýratýra qoldanystaǵy qylmystyq-protsestik zańnamasyna birqatar ózgerister daıyndady. 2020 jyldyń 1 qazanynan bastap pılottyq rejımde bul jumysqa barlyq óńirler qosyldy. 2020 jylǵy 31 jeltoqsannan bastap «Qylmystyq protseste azamattardyń quqyqtaryn qorǵaýdy kúsheıtý týraly» zań kúshine endi. Onda prokýrordyń negizgi protsestik sheshimderdi kelisý rásimi kózdelgen.
«Bul jumystyń máni tergeýshi adamdy kúdikti dep taný, áreketti saralaý, qaıta saralaý, merzimderdi úzý, isti toqtatý týraly óziniń sheshimin, sondaı-aq adamdy aıyptaý hattamasyn jáne buıryq óndirisin qoldaný týraly qaýlyny elektrondyq túrde «Sotqa deıingi tergep-tekserýdiń biryńǵaı tizilimi» aqparattyq júıesinde qalyptastyrady», - dedi Bas prokýrordyń orynbasary.
Bul rette prokýror onlaın rejımde belgilengen merzimde olardyń zańdylyǵyn tekseredi. Zańnyń buzylýy anyqtalǵan jaǵdaıda sharalar qabyldaıdy. Prokýrordyń kelisýi men bekitýinsiz joǵaryda kórsetilgen protsestik sheshimderdiń zańdyq kúshi bolmaıdy. Budan basqa, qylmystyq protseske qatysýshylar qabyldanǵan protsestik sheshimderdi qashyqtan qadaǵalaýǵa, kelispegen jaǵdaılarda olarǵa ýaqtyly shaǵymdanýǵa múmkindigi bar.
«Mundaı model is júrgizý qujattaryn daıyndaý ýaqytyn jáne tergeý merzimderin qysqartady. Qylmystyq qýdalaý aıasynda zańsyz jaýapqa tartylǵan adamdardyń quqyqtary men bostandyqtaryn qorǵaýdy qamtamasyz etedi. Osy jańalyqtardy iske asyrý qylmystyq protsestiń úsh býyndy modeline kóshýdiń birinshi kezeńi bolyp tabylady», - dedi ol.
Bas prokýratýra málimetinshe, 2021 jyldyń basynan Qylmystyq-protsestik kodeks aıasynda prokýrorlarmen 29 934 sheshim kelisildi jáne bekitildi. 4 101 sheshim boıynsha kelisýden jáne bekitýden bas tartyldy.