Prokýror Saltanat Núkenovanyń uıaly telefonyndaǵy jazba, sýretterdi jarııalady
Búgingi sot protsesi marqum Saltanat Núkenovanyń uıaly telefonyn zertteýden bastaldy.
Prokýror WhatsApp jelisindegi S.Núkenova men Q.Bıshimbaevtyń hat almasý mátinin jarııalady. Onyń ishinde aýdıo jazbalar da bar.
Bıshimbaev marqum Saltanattyń uıaly telefonynda «Mahabbatym» degen atpen saqtalǵan eken.
Jazbalardyń birine toqtalsaq, 2023 jyldyń 8 qarashasynda Bıshimbaev Saltanatqa bylaı dep jazady:
«Salta, sen maǵan dezodorantqa tapsyrys bermediń be? Men sport zalyndamyn, endi esime tústi. Ádettegideı umyttyń ba?» - deıdi Q. Bıshimbaev.
Oǵan Saltanat bylaı jaýap beredi:
«Tapsyrys berdim, janym. Qazir ákeledi. Ótken joly men kýrerge keıinirek tapsyrys bergim kelgen. Qazir beremin saǵan. Keshirshi, ótinemin. Búgin men SMM boıynsha taǵy biraz jumys istedim. Sen áli joldasyń ba?» - dep S. Núkenova jaýap qatqan.
Eske salsaq, 2023 jyly 9 qarashada Astanadaǵy «Bau» meıramhanasynda burynǵy Ulttyq ekonomıka mınıstri Qýandyq Bıshimbaev óziniń jubaıyn soqqyǵa jyqty. Áıel jedel járdem jetkenshe kóz jumdy. Munan soń Іshki ister mınıstrligi Qýandyq Bıshimbaevtyń ustalǵanyn rastady.
Ótken jyly 15 qarashada ótken keńeste Memleket basshysy Qasym-Jomart Toqaev Іshki ister mınıstrine Q. Bıshimbaevtiń isin erekshe baqylaýǵa alýdy tapsyrdy. Bıyl 11 qańtarda elorda soty Qýandyq Bıshimbaevty kúzetpen ustaý merzimin 2 aıǵa uzartqan edi, 26 aqpanda Qýandyq Bıshimbaevtyń isi sotqa tústi.
1 naýryzda Qýandyq Bıshimbaevtyń isi boıynsha aldyn ala tyńdaý kúni belgilendi. 11 naýryz kúni Astananyń Qylmystyq ister jónindegi mamandandyrylǵan aýdanaralyq sotynda is boıynsha aldyn ala tyńdaý ótti. Aldyn ala tyńdaý 12 naýryzda jalǵasty.
27 naýryzda elordanyń qylmystyq ister jónindegi mamandandyrylǵan aýdanaralyq sotynda Q.Bıshimbaevtyń isi boıynsha alqabılerdi irikteý ótti. 29 naýryzdaǵy sot otyrysynda marqum Saltanat Núkenovanyń aǵasy Aıtbek Amangeldi kýáger retinde jaýap berip, Qýandyq Bıshimbaev pen Saltanat Núkenovanyń arasyndaǵy alǵashqy urys-kerister qalaı bastalǵany týraly málimetter aıtty jáne marqumnyń bet-álpeti kógergen sýret kórsetti.
1 sáýirdegi sot otyrysynda aıyptalýshy Qýandyq Bıshimbaev marqum S. Núkenovanyń týystarynan keshirim surady.
Sondaı-aq sot eks-mınıstr Qýandyq Bıshimbaevtyń isindegi taraptarǵa áleýmettik jelide pikir bildirýge tyıym saldy.