Prokýror isterdiń jekelegen sanattaryna ǵana qatysatyn bolady
«El Prezıdenti Qazaqstan halqyna Joldaýynda zańnamanyń barlyq qarama-qaıshylyqtary men dúdámal tustar azamattarǵa túsindirilýi tıis ekenin taǵy bir ret atap ótti. Qazirgi tańda sot isin júrgizýdiń úsh túri bar, olar: qylmystyq, ákimshilik jáne azamattyq sot isin júrgizý. Barlyq daýlar, onyń ishinde azamat pen memleket arasyndaǵy daýlar biryńǵaı erejeler boıynsha qaralady. Atap aıtqanda, taraptardyń teńdigi, kúrdelengen tártip eskerilgen, sondaı-aq sot dáleldemelerdi jınaýdan bosatylǵan», - dedi A. Qydyrbaeva Parlament Májilisinde Ákimshilik rásimdik-protsestik kodeks jobasynyń tanystyrylymy barysynda.
Onyń sózine qaraǵanda, ákimshilik ádilet qalyptasqan shet elderde buǵan kerisinshe jaǵdaı baıqalyp otyr, sýdıa dáleldemelerdi ózi jınaıdy, isti qaraýdyń jeńildetilgen tártibi qoldanylady.
«Bizde áli kúnge deıin jarııa-quqyqtyq daýlardy sheshýdiń tolyqqandy tártip joq. Barlyq qıyndyqtardy azamat ózi sheshedi. Azamat memlekettik organdar men sotqa jalǵyz qarsy turady. Jaǵdaıdy prokýrordyń iske qatysýy da qıyndatady. Biraq prokýror memlekettik organnyń jumysyn almastyrýǵa tıisti emes. Nege azamat durys talap berse de, zań boıynsha utylady? Sebebi, qazirgi azamattyq protseste dálelder keltirip, talabynyń durys ekenine sotty sendirgen adam utady. Azamattyq protsestiń zańdary boıynsha sot taraptardyń usynǵan dálelderine baǵa beredi, óz betimen talap-aryzdyń sheginen shyǵyp, ádiletti sheshim qabyldaı almaıdy. Mundaı jaǵdaı taraptardyń teńsizdigin kórsetedi. Budan basqa, protsestiń labırıntteri azapmattarǵa jeńip shyǵýǵa múmkindik bermeıdi. Sondyqtan jobanyń maqsaty – azamat pen memleket arasyndaǵy daýlardy sheshýdiń ońaı ári jeńil tetigin tabý», - dedi
Onyń atap ótýinshe, Kodekstiń jobasy talap-aryzdy qabyldaý jáne qaraý rásimin jeńildetedi. Sýdıany kóptegen kerek emes uıǵarymdar shyǵarýdan bosatady.
«Іs talap-aryz berilgen ýaqyttan bastap qozǵalǵan bolyp sanalady, olardyń 4 túri bar: daý aıtý týraly, májbúrleý týraly, áreket jasaý týraly, taný týraly. Barlyq talap-aryzdar sotqa bir aı merzimde beriledi. Prokýrordyń qatysýy qysqartylady. Prokýror isterdiń jekelegen sanattary (salyqtyq, kedendik, ekologııalyq, bıýdjettik daýlar) boıynsha qatysatyn bolady», - dedi Aıgúl Qydyrbaeva.