Prokýratýra týraly zańǵa zańsyz aktıvterdi qaıtarýǵa baılanysty túzetý engiziledi
Zań jobasyn qos Palatanyń depýtattaryna Májilis ókili Abzal Quspan tanystyrdy. Onyń aıtýynsha, túzetýlerdiń birinshi toby prokýratýra júıesinde aktıvterdi qaıtarýǵa baǵyttalǵan jańa ýákiletti organnyń qurylýymen baılanysty zańnamaǵa usynylyp otyr. Bul jańa vedomstvo aktıvterdi izdestirýge jáne qaıtarýǵa qatysy bar barlyq memlekettik apparat qyzmetin jumyldyrady. Sondaı-aq, bul ýákiletti organ zańsyz ıemdenilgen aktıvterdi qaıtarýǵa baılanysty qurylatyn komıssııanyń fýnktsııasyn atqarady.
«Túzetýlerdiń ekinshi toby – aktıvterdiń paıda bolýynyń qaınar kózi, shyǵý tegi, zańdylyǵyna qatysty aqparattardy monıtorıng jáne taldaý jasaýdy Konstıtýtsııalyq zańdar deńgeıinde quqyqtyq reglamentatsııa jasaý qajettiligimen baılanysty.
Osyǵan baılanysty, Konstıtýtsııalyq zańmen bekitilgen prokýrorlardyń quqyqtary, tıisinshe jańa erejelermen tolyqtyrylady», - degen Májilis depýtaty Konstıtýtsııalyq zańǵa engiziletin jańa normalardy atap shyqty. Olar:
1. Aktıvterdi izdestirý men qaıtarý qyzmeti;
2. Aktıvterdiń shyǵý tegin anyqtaý, olardyń saqtalýyn qamtamasyz etý sharalaryn qoldaný, aktıvterdi qaıtarýǵa baılanysty halyqaralyq yntymaqtastyq ornatý;
3. Ýákiletti organdar qyzmetin úılestirý jáne baılanys ornatý;
4. Aktıvterdi qaıtarýǵa qatysty kelisimderdi jasasý;
5. Sottarǵa qamtamasyz etý týraly ótinishhattar berý, zańsyz ıemdenilgen aktıvterdi memleket menshigine qaıtarý týraly Qazaqstan Respýblıkasynyń azamattyq protsestik zańnamasyna sáıkes, talap aryzdar berý;
6. Qazaqstan Respýblıkasy zańdary men Qazaqstan Respýblıkasy Prezıdentiniń aktilerimen kózdelgen basqa da mindetter men ókilettikterdi júzege asyrý.
Parlamenttegi qos palata depýtattary usynylǵan zań jobasyn eki oqylymda talqylap, qujatty qabyldaý týraly sheshim shyǵardy.
Aıta keteıik, ótken aptada Májilis aktıvterdi memleketke qaıtarý jónindegi zańdy qabyldaǵan edi.