Prokýratýra magıstraldy munaı qubyrlarynyń qaýipsizdigine alańdaıdy
Bul jaıynda búgin BAQ ókilderine QR Bas kólik prokýratýrasynyń basqarma bastyǵy Almas Amanov málim etti, dep habarlaıdy QazAqparat.
«Taıaýda qubyr jelisi kólikteri nysandaryna aýqymdy tekserý júrgizdik. Atap aıtqanda, «QazTransOıl» men «Intergaz-Ortalyq Azııa» AQ-laryn tekserdik. Onyń aıasynda birqatar óreskel buzýshylyqtar anyqtaldy. Olardyń aýyr saldary bolýy múmkin. Qazaqstanda 9 myń shaqyrym magıstraldy qubyr jelisiniń apattyq jaǵdaıy belgisiz. Óıtkeni ol qubyr jelilerine ishki dıagnostıka júrgizilmegen. Ózderińiz de bilesizder ishki dıagnostıka qubyr jelisiniń ishindegi barlyq jaryqshaqtardy anyqtap beredi», - dedi ol.
Onyń aıtýynsha, birqatar uıymdar ishki dıagnostıka barysynda anyqtalǵan jaryqshaqtardy jóndeý sharalaryn qolǵa almaǵan. Máselen, «QazTransOıl» kompanııasy qubyrdaǵy munaı qysymynyń deńgeıine jaýapty 500-ge jýyq qural-jabdyqty paıdalaný merzimi ótip ketse de, áli kúnge qoldanyp otyr. Atalǵan qural-jabdyq isten shyqqan jaǵdaıda qubyr jarylyp, munaı syrtqa aǵýy múmkin.
«Prokýratýra organdaryn magıstraldy qubyr jelileriniń basym bóliginiń eldi mekender aýmaǵynan ótetindigi alańdatyp otyr. Sebebi ol jerlerde qubyr jelileri úshin qorǵalatyn aımaq belgileri ornatylmaǵan. Magıstraldy qubyr jelilerine taqalaý ornalasqan qurylystar óte kóp. Bul ásirese Atyraý, Ońtústik Qazaqstan, Almaty oblystarynda jáne Almaty qalasynda jıi kezdesedi. Mundaı qurylystardyń, onyń ishinde turǵyn úıler men áleýmettik nysandardyń sany shamamen 1400-ge jetedi», - dedi Amanov.