Prokýratýra «Qazaqstan temir joly» kompanııasyn tekserýi kerek – Májilis depýtaty

<p>Májilis depýtaty Ajar Saǵandyqova turǵyndarǵa kómirdiń ýaqytyly jetkizilýine alańdaýshylyq bildirip otyr, dep habarlaıdy <a href="https://kaz.inform.kz/" target="_blank" rel="noopener">QazAqparat</a> tilshisi.</p>

«Biz halyqqa kómir jetkizý máselesin kótermekpiz. Qaraǵandy oblysynyń jer qoınaýyn paıdalanýshy kompanııalardyń derekteri boıynsha «Razrez Kýznetskıı» JShS jáne SAT Komir JShS kómir tasymaldaýǵa vagondardyń 22% ǵana bólgen. Bul qazaqstandyqtardy kómirmen tolyq qamtýǵa kedergi keltiredi. Bizdiń málimetterimiz boıynsha, Qazaqstanda jyljymaly parktiń tek eki iri operatory bar: «Qaztemirtrans» AQ jáne «QTJ – Júk tasymaly» JShS. Olar «Qazaqstan temir joly» AQ-nyń enshiles kompanııalary. Al «Qaztemırtrans» AQ balansynda 40 myńǵa jýyq júk vagony bar», - dedi Ajar Saǵandyqova Premer-Mınıstrdiń atyna saýal joldaı otyryp.

Halyq qalaýlysynyń aıtýynsha, kómir jetkizý jyl saıyn problema bolyp otyr. Óńirlerdiń ákimdikteri kómirdi jetkizýdi qolmen retteýge májbúr.

«Kómirdi jetkizýdegi irkilistiń sebepteri vagondardy ýaqytyly jetkizbeý jáne halyqqa kómir jóneltý kestesininiń artta qalýymen baılanysty. Birneshe jyldan beri biz barlyq aımaqta kómir kezeginiń ósip kele jatqanyn baıqaımyz. Keıde onyń arty qaqtyǵystarǵa ulasyp jatady. Alypsatarlar buny sátti paıdalanady. Saldarynan qarapaıym halyq kómirsiz qalady, ásirese muqtaj jandar»,-dedi.

Sóz sońynda depýtat Úkimet basshysy Álıhan Smaıylovqa eki usynys jasady.

1. Kómirdi tasymaldaý boıynsha barlyq kásiporyndar úshin teń jaǵdaıdy qamtamasyz etý;
2. «Qazaqstan temir joly» ulttyq kompanııasy» AQ qyzmetine prokýrorlyq tekserý júrgizý.