Prokýratýra Anatolıı Balýshkınge qatysy bar 77 jyljymaıtyn múlikti qaıtarý týraly sotqa qoldaýhat joldady

NUR-SULTAN. QazAqparat – BIPEK kompanııalar tobynyń aktsıoneri, halyqaralyq izdeýde júrgen Anatolıı Balýshkınge qatysy bar 77 jyljymaıtyn múlik memleketke qaıtarylýy múmkin. Ekonomıkalyq resýrstardyń zańsyz shoǵyrlanýyna qarsy is-qımyl máseleleri jónindegi vedomstvoaralyq komıssııa osyndaı málimet taratty, dep habarlaıdy QazAqparat tilshisi.

«11.07.2022 jyly Shyǵys Qazaqstan oblysynda A. Balýshkınge (halyqaralyq izdeýde, BIPEK kompanııalar tobynyń aktsıoneri) qatysty is boıynsha prokýratýra 77 jyljymaıtyn múlikti (onyń ishinde «Rahman qaınary», «Nurtaý» jáne «Port Fortýna» demalys bazalaryn), sondaı-aq 1 myń birlik jyljymaly múlikti sotqa deıin tárkileý týraly qoldaýhatty sotqa joldady.

Kúdiktilerdiń qylmystyq aktıvterin, onyń ishinde shetelde anyqtaý, tyıym salý jáne tárkileý jumystary jalǵasýda», - dep jazylǵan vedomstvoaralyq komıssııanyń aqparatynda.

Atalǵan komıssııa UQK burynǵy basshylary men qyzmetkerleriniń Gonkong pen BAÁ-degi 3 mln dollary qaıtarylǵanyn da habarlaǵan bolatyn.

«Ulttyq qaýipsizdik komıtetiniń burynǵy basshylary men qyzmetkerlerine qatysty is boıynsha Gonkong pen BAÁ-den shamamen 3 mln AQSh dollary qaıtaryldy. Qarjylyq monıtorıng agenttigi Boranbaevqa qatysty isti tergep-tekserý barysynda «Qazmunaıgaz» AQ-ǵa shamamen 11,3 mlrd teńge óteldi. Jambyl oblysynda senip tapsyrylǵan múlikti ıemdenip alý jáne talan-tarajǵa salý faktisi boıynsha qylmystyq isti tergep-tekserý sheńberinde «TarazEnergosbyt» AQ memlekettik uıymyna 2,2 mlrd teńge óteldi. Ózge mysal, qazirgi ýaqytta «Olımp» BK laýazymdy adamdaryna qatysty qylmystyq is aıasynda alyp qoıylǵan $5,5 mln jáne €200 myń qarajatty Ulttyq Bankke aýdarý rásimi júrip jatyr» dep jazylǵan resmı málimette.